Lakbayan 2017 hale sa Mindanao naghapit sa Naga

August 31, 2017

 

Pagtenir kan Martial law pigdedenuncia

Naghapit sa Ciudad nin Naga kan Sabado, Agosto 26 an maabot sa on mil docientos (1,200) na mga katutubo para sa saindang Lakbayan 2017 na naghale sa Mindanao kan Agosto 21, lunad sa bus asin jeepney asin nagmartsa sa mga mayor na calle kan ciudad nganing magpasiring sa Manila bitbit an saindang mga placards na nagdedenuncia kan padagos na pagmantenir kan Martial law sa Mindanao asin nagkokondenar sa panggagadan ki Kian Loyd Delos Santos.

An grupo pinangenotan kan saindang lider na si Dato Guayon nagpahayag na an saindang martsa na sundo sa U.P. Diliman iyo an padagos nindang protesta contra sa pagpalawig kan Martial law na apektado na an mga pagbuhay asin negosyo sa Ciudad nin Marawi asin pagtaraig pang lugar.

Mayong ginigibong solusyon sa pagtios an administrasyon Duterte sa Mindanao envez mas lalong pinagabat an pagbuhay huli sa Martial law, sabi pa.

Kabale sa nagpaparticipar iyo an sektor nin paraoma asin militanteng grupo sa Mindanao nanindugan na kun saindang binoto kan nakaaging presidential election si Presidente Rodrigo Duterte alagad dai na sinda uyon sa pagpadalagan kan gobierno huli ta dai man narerealisar si mga pangako sa rehiyon kan Mindanao, pinapadificilan pa kan pagbuhay sa dahilan na apektado na an saindang pagbuhay.

Saindang pigrereclamo an mga nangyayaring extrajudicial killings na rinibo  nang  namamanuan an biktima asin pagtinaktinak sa deretso humano.  Saro sa kabale sa mga biktima digdi iyo si Kian Loyd Delos Santos.

Saindang pinahimotikan an akusasyon ni Presidente na sinda mga rebeldeng NPA.

An Makabayan Bikol sa pamamayo ni Tess Pielago iyo an nagsabat sa sainda sagcod pagpahomali pasiring sa Manila.





 

Share on Facebook
Share on Twitter
Please reload