Problema sa iskuwater dai matatapos sa 2022-HSDO

August 31, 2017

 

 

Mas marhay amay na nag-aandam an lokal na gobierno kan Ciudad nin Naga  sa  housing masterplan na pigtutulod ni Consejal Julian Lavadia Jr. na target kan consejal na maging zero iskuwater sa Naga sa 2022, alagad sa pag-aadal kan Housing Settlement  and Development Office (HSDO) kan City Hall dai malilikayan dawa perang taon igwang mabutwang mga iskuwater na ngonian inaapod nang informal settlers.

Alagad kun magibo nin mas efektibong plano nagtutubod si Lavadia na marerealisar an zero iskuwater.

Si Engr. Rolando Campillos pamayo kan HSDO nagpahayag na suportado niya an plano kan consejal mantang yaon an funding agency sa housing program sa paagi kan National Housing Authority (NHA) asin yaon man an Housing Urban and Development Coordinating  Council (HUDCC) na nagtatabang sa lado nin aspeto teknikal.

Pigtatawan muna nin prioridad iyo an pagtapos kan Local Shelter Plan (LSP) na iyo an paagi nganing matawan nin solusyon an problema sa pagpaharong nganing ideclara bilang Informal Settler Family (ISF) free an ciudad na saro pigmamawot kan HUDCC.

Sinabi ni Lavadia sa saiyang ginibong coordinasyon ki Engr. Christine Abano, regional coordinator kan HUDCC Bikol an LSP saro sa rekisitos kan ahencia nganing madale an proceso sa programa sa informal settler.

Target kan HSDO an sampulong taon o hasta sa 2027 nganing makawas na an City Hall sa problema sa iskuwater asin tinatapos na ninda an paghaman kan LSP.

Sa listahan kan HSDO, sinabi ni Engr. Campillos labi pa sa diez mil (10,000) na mga iskuwater sa Naga kabale digdi si yaon sa mga nag-eestar sa gilid kan relis sa Philippine National Railways alagad labi na sa 6,500 an aplikante na pendiente pa sa saindang oficina.

An urban poor program pinunan kan panahon ni dipuntong Alcalde asin DILG Secretary Jesse Robredo kan siya jefe ejecutivo kan ciudad sa enot kaining termino hasta inabot nin 18 años sa puesto, alagad dai matapos-tapos an problema sa informal settlers.

Dawa pigpadagos ni dating Alcalde Cho Roco na nagserbe  sa  laog nin tolong taon hasta sa presenteng administrasyon ni Alcalde John Bongat dai nahahale an informal settlers.

Sa ngonian iginilid muna kan HSDO an mga nagpipilang bagong aplikante sa saindang opisina  huli kan pinaluwas na moratorium base sa pinasar na resolucion kan Sangguniang Panlungsod na dapat taposon muna an problema  kan 6,500 na mga aplikante.

Pigkakarkulo ni Consejal Lavadia na maabot sa P350 milyon an kaipuhan na fondo na gagamiton sa pagbakal nin lote, alagad sinabi ni Campillos magkukulang pa an sinambit na fondo mientras na padagos na naglalangkaw an presyo kan daga sa ciudad.
 
 Kun sa cada benipisyaryo familia kaipuhan an 52 metros cuadrado kaipuhan kan ciudad an 65 hektarya.                                                                                        (dpa)    




 

Share on Facebook
Share on Twitter
Please reload