CHO, nagpatanid maglikay sa dayuhan na mga GROs

September 7, 2017

 

An City Health Office kan lokal na gobierno kan Ciudad nin Naga nagpatanid sa publiko orog na si mahelig magpalipas nin halipot na kaogmahan na maglikay sa nag-arabotan na mga guest relation officers (GROs) huli ta delicado an iba sa sainda may bitbit na helang na Human Immunodeficiency Virus/Acquired  Immunodeficiency Syndrome (HIV/AIDS).

Kinompirmar ni Dr. Vito ‘’Butch’’ Borja, pamayo kan CHO na abot sa cincuenta (50) dayuhan na GROs an yaon na ngonian sa Ciudad nin Naga naka check-in sa manlaen-laen na hotel mantang aram ninda na dakul an saindang makukuang kostumer na mga bisita sa ciudad ngonian na panahon kan festividad ni Ina.

Napag-araman na igwang hale sa Daet, Camarines Norte, Ciudad nin Legaspi, Ciudad nin Davao, Cebu, asin iba pang lugar mantang an saindang mga bugaw taga Naga man sana na dati nang envuelto digdi na iyo an saindang ginigibong hanap buhay.

Kun talagang dai makakatios magpaseguro maggamit nin condom nganing dai makabale sa padagos na paglangkaw kan casong HIV/AIDS sa Ciudad nin Naga asin Camarines Sur, sabi pa ni Borja.

Mga ‘’social na sinda’’ dai mamidmid na GROs, kaya an patanid kan CHO maglikay. Sinda mayong pink card na pig-iisyu kan CHO.

Sa pinakahuring pinaluwas na listahan kan Departamento de Salud (DOH) nagsakat na sa setenta y cinco (75) na nin caso sa HIV/AIDS puon kan taon 1994 hasta ngonian na 2017 na an 80 por ciento kaini sa Naga macoconsiderang ‘’full blown’’, sabi pa.

An CHO padagos an saindang campaña sa paagi nin mga advocacia laban sa sinambit na delicadong helang na nakukua sa pakikipag-sex na an may halangkaw na casong pasyente kaini huli sa lalaki-sa lalaki.

Igwa nang ginigibong pagsubaybay an CHO sa nagkaperang hotel kasunod kan saindang advocacia laban sa HIV/AIDS.

 Sinabi man ni Ms. Maria Grace Guevarra kan Social Hygiene Clinic kan CHO nag-aabot sana sa veinte (20) mga GROs sa Naga an regular na nagpapa-check up sa sainda na igwang kapot na pink card.

An pink card pig-iisyu kan CHO sa mga GROs na mayong helang arog kan sexuality transmitted disease.

Si Dr. Rey Millena kan DOH Bikol nagpahayag na padagos an paglangkaw kan kontrobersyal na helang asin considerado nang nakaka-alarma an marikas na paglangkaw kan caso.

An CHO asin DOH nagpapadreno nin mga seminar nganing matukdoan an tawo kun panong makakalikay laban sa sinambit na helang na sagcod sa ngonian mayo pa nin permanenteng bulong.




 

Share on Facebook
Share on Twitter
Please reload