Komprehensibong plano oorolayan kan MNDC: Konsepto kan Mega Cebu i-aadaptar

September 7, 2017

 

Panahon nang punan kan Metro Naga Development Council (MNDC) an paghaman nin sarong komprehensibong plano nganing mag-asenso man an nakapalibot na munisipyo na miembros kan consejo.

Si Consejal Julian Lavadia Jr. pamayo kan Committee on Trade and Investment kan Sangguniang Panlungsod kan Ciudad nin Naga sa paagi kan saiyang privilege speech sa sesyon regular kan Martes, Septiembre 5 nagpahayag na sa saindang study tour sa Metro Cebu nahiling ninda kun gurano ka progreso an lugar na ini.

Gabos sa Metro Cebu asensado asin mayong nawawalat. Anom na ciudades an kompuesto kaini asin an saro digdi kapangaran an Naga City.

Kan nakaaging Marso veinte hasta veinte cuatro, an Committee on Trade and Investment na saiyang pinamamayohan, kaibahan an MNDC asin an DTI and Investment-Camarines Sur nagkaigwa sinda nin benchmarking tour sa Metro Cebu.

Sinabi ni Lavadia kabale sa tatawan duon sa conferencia iyo an programa sa land use plan, economia, turismo asin agricultura na dakulang bagay sa pag-asenso kan mga miembro kan MNDC.

‘’Napahapot ako kan nagirumduman ko an pangenturogan ni dating alcalde asin Interior Secretary Jesse Robredo para sa Metro Naga, ano daw an sekreto kan Metro Cebu ta nagibo nindang mapahiwas asin mapalakop sa lambang banwaan kaini an asenso na saindang namati? Ano an mayo sa Metro Naga kun tano digdi sato, an mga nakapalibot tang mga munisipyo, sa lawig kan panahon na nag-agi, mayo pang naging ciudad?, sabi pa sa privilege speech kan consejal.

Napag-araman pa ni Lavadia na sa laog kan Sustainable Roadmap for Mega Cebu 2050 an gabos na estratihiya asin polisya na pinagkasurondoan kan gabos na miembros, kaibahan an pribadong sektor. Sa sinambit na documento, mahihiling an unidad asin sarong direksyon kan mga banwaan sa mga maabot na panahon.

Huli kan saindang mga pag-aadal asin obserbasyon, pig-rekomendar kan consejal ki Alcalde John Bongat na magkaigwa nin pag-orolay an mga miembros kan MNDC sa posibleng pag-adaptar kan best practice kan Metro Cebu.

Nahurophurop kan alcalde an benipisyo kan konsepto asin nagtugot na magconducir nin conferencia na pigtalaan sa Septiembre 9, 2017 ala una nin hapon sa Avenue Plaza Convention Center, Ciudad nin Naga.


Nakatalaan mag-atendir sinda dating DTI Assistant Secretary Joel Mari Yu, na ngonian nagseserbi na economic adviser ni Alcalde Tomas Osmeña kan Cebu, San Fernando Mayor Lakambini Reluya asin Eduardo Aboitiz kan Development Studies Center, Executive Director Evelyn Nacario-Castro na saindang ipapaliwanag an mas hararom an Mega Cebu 2050 concept.
  An tema kan conferencia, inapod na Mega Naga: Jesse M. Robredo’s Vision for Metro Naga bilang pagtaong onra sa dating alcalde na naging pamayo kan MNDC.

Kabale sa maatendir sa programa bilang bisita sinda, Bise Presidente Leni Robredo, Arzobispo Rolando Tria Tirona, Congresista Gabriel H. Bordado kan tercer distrito kan CamSur, NEDA regional director Agnes Espinas asin Daniel De Leon, regional chairman kan Bicol Tourism Council.

An opisyales lokal na miembros kan MNDC maarabot sa okasyon asin miembros kan Sangguniang Panlungsod kan Ciudad nin Naga sa pamamayo ni Bise Alcalde Nelson Legacion.


 

Share on Facebook
Share on Twitter
Please reload