Matuninong na piyesta pigasegurar kan NCPO

September 14, 2017

 

Labi sa tres mil an augmentation force sa Naga City Police Office (NCPO) kabale an 1,298 miembros kan Philippine National Police (PNP) gikan sa Camp Simeon Ola kan Bikol PNP nganing maasegurar an seguridad asin paz y orden sa kapiestahan sa Ina kan Bikolandia lalo na sa gigibohon na fluvial procession sa Sabado, Septiembre 16.

Maabot sa dos milyon na devotos an nadagsa sa selebrasyon kan Festividad ni Ina, na considerado pinakadakulang debosyon sa Asia base sa karkulo kan Joint Operations Center asin kan NCPO.

Bako lang dakulang numero nin augmentation force alagad yaon an estrictong implementasyon kan gun ban na nag-efecto kan Septiembre 8 hasta Septiembre 17 ngonian na taon, pag-gadan kan signal kan mga cellphone companies sa darakulang actividad kabale na an fluvial procession, pagmukna kan Task Force Unit para sa mga VIPs, Task Force Voyadores asin Task Force Venue na

mataong higot na seguridad sa mga lugar kan darakulang actividades.

Si SPO2 Tobias Bongon, parataram kan NCPO nagpahayag sa Bicol Mail na afuera kan labi sa on mil na augmentation force kan Bikol PNP, igwa pang dugang na soldados kan 9th Infantry Division kan Philippine Army, support unit kan Explosive and Ordnance Division, Philippine Coast Guard, K 9 dog, maritime group, Philippine Navy, Airforce, AFP reserves, Police trainees, asin iba pang mga force multiplier.

Sinda iwawarak sa mga actividades sa kapiestahan ni Ina kabale na sa civic asin military parade, may mga nakadestino sa Metropolitan Cathedral, Peñafrancia shrine, Basilica Minore, San Francisco Church asin iba pang mga simbahan kabale na an centro de comercio asin mga establisimiento de negosyo asin 24/7 an saindang duty, sabi pa ni Bongon.

Nganing macierto na mayong mga masukbit nin ilegal na armas estrictong pig-iimplementar an sampolong aldaw na gun ban puon kan Septiembre 8 hasta Septiembre 17, ngonian na taon.

Babantayan kan PNP asin Philippine Army an mga mayor na tulay kan ciudad na dai tiriponan nin tawo sa pag-agi kan fluvial procession nganing maibitaran an trajedia arog kan pagbagsak kan tulay kan Colgante kan taon 1972.

   Sinabi pa kan NCPO na resulta kan saindang mga pag-andam sa seguridad nganing maseguro an paz y orden naging matuninong si paz y orden kan nakaaging traslacion procession sa pagbalyo kan imahen ni Divino Rostro asin Ina hali sa Penafrancia Shrine pasiring sa Naga Metropolitan Cathedral.                                                                                        (DPA)       



 

Share on Facebook
Share on Twitter
Please reload