Pagputol sa signal kan mga companiya nin telepono, nagani nin mga tuyaw

September 21, 2017

 

Bakong paborable sa publiko an desisyon kan Naga City Police Office (NCPO) na putolon an mga signal kan mga companiya nin telepono sa panahon na nagkakaigwa nin dakulang actividades sa ciudad sa kapiestahan ni Nuestra Senora de Peñafrancia.

Dai man epekto an pigsasabi kan NCPO na ‘’confidential’ an pagpaluwas nin informasyon sa publiko kun anong oras pupotolon an mga signal mientras na an National Telecommunication nagsadiri man desisyon sa amay na pagpaluwas na mawawara an signal kan mga compania nin telepono.

Si Bise Alcalde Nelson Legacion nagpahayag na dakul si mga negatibong reaksyon, mga reclamo bako lang gikan sa Nagueños envez sa mga visita kan ciudad kan putolon an mga signal kan mga cell phone company sa panahon na gayo kan regional military street parade competition asin fluvial procession sa Ina kan Bikolandia.

Kabale sa mga nagreclamo iyo si may mga emerhenciang pasyente na dadarahon sa hospital dai makaapod sa sadiring tawo na kaipuhan an presencia huli ta mayong signal an CPs.

Huli kan mga reclamong ini, sinabi kan bise alcalde na saiyang iinvitaran sa masunod na sesyon regular kan Sangguniang Panlungsod si Acting City Director P/Sr. Supt. Jonathan Panganiban nganing hagadan nin paliwanag sa sinambit na isyu.

An pamayo kan SP nagsabi na dai man siya uyon sa negatibong lakdang na ini kan NCPO.

An NCPO iyo an naghagad sa National Telecommunication na dapat putolon an mga signal kan mga companiya kan CPs sa panahon kan traslacion, fluvial procession ki Ina asin sa regional military street parade competition sa dahilan para sa seguridad sa mga actividades kan festividad ni Ina mientras na an CP pueding gamiton sa pagpasabog nin bomba.

Pigtrato kan NCPO sa publiko asin sa miembros kan media na ‘confidential’ an pagpaluwas ninda nin informasyon kun anong oras pupotolon an mga signal kan cell phone companies.

Apesar kan pigsasabi ni ACD Panganiban na ‘’Confidential’’ an pagtao nin oras, dai man ini naging epektibo mientras na sarong aldaw antes kan military parade asin fluvial procession sa Ina, an NTC nagpaluwas nin anuncio sa publiko asin pinaagi pa sa KBP Camarines Sur Chapter na mawawara an mga signal kan CPs sa panahon kan sinambit na mga actividades.           (DPA)
 

Share on Facebook
Share on Twitter
Please reload