SABI KAN BAYAN BIKOL: Apat na mga opisina kan gobierno, NCPO ibabalyo sa Almeda Highway

September 21, 2017

 

Apat na ahencias de gobierno asin central headquarter kan Naga City Police Office (NCPO) ibabalyo na sa Almeda Highway, Barangay Concepcion Grande, sa lote na pagrurogaring kan lokal na gobierno kan Ciudad nin Naga.

Si Bise Alcalde Nelson Legacion, pamayo kan Sangguniang Panlungsod nagsabi an mga ahencias na may opisina sa ciudad alagad nagtugot na mabalyo kan saindang mga edificio kinababalihan nin Provincial Office kan Department of Interior and Local Government (DILG), District Office kan Land Transportation Office (LTO), Provincial Office kan Department of Agrarian Reform (DAR), Sub-station kan Bureau of Fire Protection (BFP) asin NCPO na an presenteng opisina sa Calle Barlin gigibohon na sanang Police Sub-Station.

  Base sa recomendasyon kan Committee on Properties kan SP an City Hall madonar nin 2,000 metros cuadrado para sa NCPO, 500 metros cuadrado para sa DILG, 800 metros cuadrado para sa DAR, 500 metros cuadrado sa BFP asin 5,000 metros cuadrado sa LTO na tinawan nin mahiwas na espacio nganing gamiton para sa impounding area ni mga vehiculos.

Tres hektarya an lote kan ciudad na dating pagrurogaring kan familia Almeda alagad idodonar kan City Hall an kagabsan na 8,800 metros cuadrado para sa sinambit na mga ahencia asin NCPO asin tres hasta cuatro mil metro cuadrado papatukdokan nin convention center, sabi pa ni Legacion.

Susog sa plano kan lokal na gobierno an lugar kan Almeda Highway gigibohon nang central business district III sa tahaw kan padagos na paglaog nin mga darakulang establisimiento sa ciudad asin piot na sa centro maging sa central business district II.

An paghubo kan sinambit na mga opisina makakatabang sa ngaran na negosyo asin pag-uswag kan lugar mantang mababawasan an bulos kan trafico sa centro kan ciudad.





 

Share on Facebook
Share on Twitter
Please reload