ISYU SA PNR: VP Leni dai kuntento sa pangako kan DOTr

October 5, 2017

 

Dai kuntento an Bikolanang bise presidente sa pigsasabi kan Department of Transportation (DOTr) na cierto nang madadagos an implementasyon sa proyecto kan modernong Philippine National Railways (PNR) envez dapat seguradohon kun nuarin puponan an patrabajo.

Sinabi ni Bise Presidente Leni Robredo nagkaulay sinda sa sarong okasyon sa Ciudad nin Legaspi ni DOTr Secretary Arthur Tugade na nagpapangako sa saiya na dagos an patrabajo sa upgrading kan perrokaril alagad dai nagdetalye kun anong plano asin nuarin iimplementar.

Hinahagad na kan bise presidente an espesipikong panahon kun nuarin o madadagos an proyecto bako sanang magsabi na segurado na patrabajo. Pagbuelta kan sekretaryo hali sa Estado Unidos kakaulayon ko siya, sabi pa kan bise presidente.

An isyu sa PNR iyo an tutukaron sa public forum na pinaapod ninda Diputado Gabriel H. Bordado Jr, kan tercer distrito kan Camarines Sur, NPS ’67 asin ADN ’71, na kabale sa mga visita sinda VP Robredo, Senador JV Ejercito-Estrada, DOTr Usec Cesar Chavez asin PNR General Manager Jun Magno.

Aprobado na an iimplementar na modernong perrokaril kan taon 2015 mala ngani pigpresentar ko pa kaidto si time line alagad sa presenting bagong  administrasyon nagkaigwa naman pagbago kan plano na si dating konsepto na private-public-partnership (PPP) dai na marerealisar, sabi pa.

Enot nang naghanap nin interesadong mga mapartisipar sa pagsubasta alagad nagbago naman nin plano an gobierno bako nang prioridad si PPP.

Napag-araman pa na kulang an prosupuesto kan gobierno nasyonal sa 2018 para sa piglalangkag na bilyones pesos na upgrading kan perrokaril,

Magigirumdoman kan yaon pa sa puesto si DOTC Secretary Joseph Emilio Abaya sa ginibong multi sectoral forum sa City Hall na presente si Presidente Benigno Aquino III, kasabay sa ika-tolong anibersaryo sa pagkagadan ni dipuntong Alcalde asin DILG Secretary Jesse Robredo kan Agosto 18, 2015, nagcierto an DOTC Secretary na ma-iimplementar na an proyecto sa perrokaril sa 2017 na aaboton na kan bagong administrasyon.

Alagad piglinaw kaidto kan DOTC an nakakaabala na maponan tolos an patrabajo iyo an paghaman kan engineering design kaya ngani aaboton pa sa bagong administrasyon sa 2017.

P171 bilyon an pigtagamang fondo kan nagtalikod na administrasyon Aquino para sa modernong North-South Trail project na mapuon sa Ciudad nin Tugegarao hasta Matnog, Sorsogon.

Hababa an fondo ngonian kan DOTr, na base sa pinaluwas nindang informasyon nag-aabot na sana sa P151.3 bilyones para sa proyecto sa perrokaril na uutangon pa sa nasyon kan China.

Sinabi pa kaidto na aaboton nin quince hasta veinteng bulan antes matapos an detailed engineering na mapuon an proyecto sa 2017.

Pigtalaan pa na tataposon an konstruksiyon kan proyecto sa laog nin apat na taon o sagcod sa 2021 nganing maging operational na an PNR, alagad sagcod sa ngonian dai pa napuponan inabot na sa bagong administrasyon ni Presidente Duterte.



PAGPALABA KAN RUNWAY KAN NAGA

AIRPORT DAING ASEGURASYON KUN MADADAGOS

Afuera pa kaini, sa kaparejong forum pigpahayag na igwa nang nakatagamang cantidad P3.5 bilyon para sa pagpalaba kan runway kan Naga Airport sa Pili, Camarines na gigibohon nang 2.1 kilometros.

An proyecto dapat mapuon 2017 asin tataposon sa 2019, sabi pa.

Alagad sinabi pa ni Robredo apesar kan mga preparasyon kan Capitolyo Provincial kan Camarines Sur sagcod na naghanap nin lugar na babalyohan kan apektadong mga paraoma, dai naman ma-iimplementar huli ta nagbago naman nin plano.

An sektor nin negociante sa Ciudad nin Naga asin Camarines Sur asin mga Bikolano haloy nang naghahalat kan pagbalik kan viaje kan PNR asin pagpalaba kan runway kan aeropuerto.                           (DPA)


 

Share on Facebook
Share on Twitter
Please reload