Pagpahiwas kan M.T. Villanueva duwang taon nang nagpalyar

October 5, 2017

 

Duwang taon nang nagpalyar na maimplementar an road widening project sa M. T. Villanueva Avenue (dating Calle Liboton), Ciudad nin Naga huli kan ulang na mga estractura asin grupo kan mga nagcocontra sa pagputol kan mga kahoy sa road right of way, alagad sa ika-tolong taon sa 2018 idadagos na kan DPWH an proyecto nganing mapahiwas na an hayapit na national road na deretsong Magsaysay Avenue.

Sinabi ni Assistant District Engr. Richard Emmanuel Ragrario kan 2nd Engineering District kan DPWH na may opisina sa Baras, Canaman, Camarines Sur igwa na sindang ginigibong coordinasyon sa mga apektadong edificio oras na iimplementar an proyecto na positibo an resulta kan saindang orolay nganing madagos na an pagpa-lakbang kan tinampo.

Mas dakul an apektadong edificio mientras na 52 sanang mga kahoy an pwedeng purotolon para tawan buelo an implementasyon kan naabalang road widening project, sabi pa ni Ragrario.

Si Consejal Vidal Castillo, pamayo kan Committee on Infrastructure sa Sangguniang Panlungsod iyo an nagparakulit sa obras publika na dapat ibalik na an fondo sa pagpahiwas kan tinampo kan M.T. Villanueva mantang grabe na an abalang bulos kan trafico digdi huli kan hayapit na tinampo.

Kinumpirmar na ni Ragrario na ibinalik na kan saindang opisina central si P200 milyon na fondo para sa Daang Maharlika Highway (Del Rosario, Concepcion Grande hasta sa Rotonda) na may lakbang nin treinta metros asin kabale digdi an M.T. Villavuena Ave. na may lakbang nin viente metros asin cierto nang iimplementar sa 2018.

  Kabale sa papalakbangon iyo an Magsaysay Bridge, na enot nang pinahiwas an Magsaysay Avenue asin isusunod na masumpay kan kaparejong lakbang iyo an M.T. Villanueva.

Sinabi pa kan DPWH na mandato sa sainda kan gobierno nasyonal na gabos na national road pahiwason hasta sa four lanes.

An M.T. Villanueva, iyo an minasumpay kan national road haling Tinampo, Calabanga, Bombon, Magarao, Canaman asin an Bagumbayan Norte asin Sur kan Ciudad nin Naga na naagihan Magsaysay Avenue hasta pasiring sa Daang Maharlika  Highway.                                                           (DPA)



 

Share on Facebook
Share on Twitter
Please reload