SABI KAN BAYAN BIKOL : Prisonero sa NCDJ suroksokan, 67% nagaatubang caso sa droga

October 5, 2017

 

Garong sardinas na an kamugtakan kan mga prisonero o inaapod na ngonian na residentes kan Naga City District Jail (NCDJ) kan Bureau of Jail Management and Penology (BJMP) na haros an nakakapano kan mga selda nag-aatubang nin caso sa ilegal na droga o pagbalga kan Acta Republic 9165 o mas midmid sa apod na Comprehensive Dangerous Drugs Act of 2000.

Sa report kan BJMP sa ginibong Peace and Order Council meeting sa City Hall kan Martes, Oktubre 3 sa pinakahuri nindang listahan hasta kan Septiembre 30, 2017, abot na sa 552 an total nindang prisonero asin an 371 o 67.21 por ciento kaini nag-aatubang nin mga caso sa pagbalga kan RA 9165.

Kabale na sa bilang iyo an 64 babae, 49 sa sainda nag-aatubang nin caso sa ilegal na droga.

 Si JO3 Robert Nanale, na iyo an nagbiklad kan report sa POC meeting nagsabi nagsunod sa caso sa ilegal na droga iyo an theft na igwang 63, rape – 35, murder/homicide – 40, robbery – 13 asin 33 na iba pang mga caso.

Saiya pang sinabi na an 552 na residentes digdi considerado nang nakaka-alarma huli ta naglangkaw nin 360 por ciento, alagad base sa UN standard dapat an presenting capacidad kan NCDJ igwa sanang 120 prisonero.

Igwa nang 29 insular prisoners na sentenciado asin dadarahon na sa National Bilibid Prisons, makakaina na ini sa garong sardinas na kamugtakan kan selda alagad nariribayan man giraray huli ta pagsunod na aldaw asin semana igwang piglalaog na sampolo, sunod naman na semana sobra pa sa sampolo na mga bagohan na. Afuera pa kaini, igwang 34 district prisoners, sabi pa kan BJMP.

Bako lang pagbantay sa mga prisonero an saindang trabajo alagad igwa man programa sa livelihood sa tabang kan TESDA asin DTI.

Igwa pa sindang regular na campaña laban sa droga sa pag-monitor kan posibleng transaksyon kasabuwat an saindang mga visita.

Sa dai mahahaloy magiging operational na an saindang solar power sa tabang kan lokal na gobierno kan ciudad.                                                                               (DPA)




 

Share on Facebook
Share on Twitter
Please reload