TF Salbar Paraoma bibilogon kan City Hall

October 5, 2017

 

Nakatalaan magbilog nin Task Force Salbar Paraoma an lokal na gobierno kan Ciudad nin Naga nganing aramon asin matabangan an sektor nin paratanom nin mais na nagrereclamo kan padagos na pagbagsak kan presyo kaini sa mga comprada.

Sa sesyon regular kan Sangguniang Panlungsod kan Martes, Oktubre 3 pinasar an sarong resolucion na pigtulod ni Consejal

Julian Lavadia Jr., pamayo kan Committee on Agriculture nganing magcrear kan task force na papamayohan kan opisina kan jefe ejecutivo kan ciudad.

Sinabi ni Lavadia si dating presyo na P13.50 cada kilo kan mais alagad nagparababa sa P9.10 na dakulang pagkalugi kan mga paraoma bako lang sa Naga envez maging sa Camarines Sur.

Maabot sa 1,320 hektarya an tanoman mais sa Naga asin apektado digdi an labi sa dos mil na paraoma, sabi pa kan Consejal.

Saro sa lakdang kan SP saindang iimbitaran sa masunod na sesyon regular sinda Regional Executive Director Elena Delos Santos kan Departamento de Agriculture sa Bikol asin an Provincial Manager kan NFA sa CamSur.

Mawot maaraman kan Committee on Agriculture an kasimbagan kan duwang ahencia mientras na sa lado kan DA aaramon an maitataong suporta sa paraoma asin mga kahapotan sa NFA apesar na mandato sa sainda na magbakal kan produkto nin mais kan paraoma alagad paroy sana an saindang binabakal.

SA DA Bikol, sa entrevista kan Bicol Mail ki Lorenzo Alvina Corn Coordinator Program, sinabi kaini na causa kan paghuros kan presyo kan mais huli kan panahon ngonian nin aranihan nin mais asin an halangkaw an produksyon sa Ciudad nin Naga asin Camarines Sur maging sa iba pang provincia.

An saindang ahencia mayong kontrol sa presyo kan sinambit na produkto mantang an NFA mandato sa sainda na magbakal kan inaning mais kan paraoma alagad dai man ginigibo.

Sinabi pa na an Corn Board, sarong pribadong grupo an nakatalaan na mag-orolay nganing tukaron an problema sa padagos na paghuros kan presyo kan sinambit na produkto.                   (DPA)  





 

Share on Facebook
Share on Twitter
Please reload