Casong dengue naglangkaw 147 porciento

October 12, 2017

 

 

Nakakaalarma na an padagos na paglangkaw kan casong dengue sa Ciudad nin Naga matapos magabot na sa 299 an caso hasta kan Septiembre 30, 2017 na naglangkaw nin 147 por ciento kun icocompara kan nakaaging Enero hasta Diciembre 2016  igwa sanang 207 caso asin tolo nang mga menor de edad binawian nin buhay.

Alagad an City Hall mayong plano na ipasairarum an ciudad sa estado nin calamidad bakong arog kan 2015 na nagsakat sa 1,200 na ginibo ini kan lokal na gobierno.

Ini an mga pahayag ni City Health Officer Dr. Vito ‘Butch’ Borja kan mag-atubang sinda ni Consejal Sonny Rañola sa meet the press program kan

City Events Protocol and Public Information Office (CEPPIO) na an presentador iyo si Allen Reondanga.

 Padagos an ginigibong mga pulong-pulong asin fogging operation sa mga barangay kan CHO alagad kaipuhan digdi an participasyon kan comunidad nganing maghuros an caso.

Sa datus kan CHO puon Enero hasta Septiembre 30, 2017, an mga nanengenotan na limang Barangay iyo an  Cararayan na igwang 55 caso; Concepcion Pequena – 50; San Felipe – 36; Balatas asin Triangulo na parejong may 25 caso.

Si Consejal Rañola, pamayo kan Naga City Health Board nagsabi na an grupo kan Barangay Health Workers padagos kan saindang mga ginigibong ‘’search and destroy’’ na nakatalaan nindang orolay an iba pang mga gigibohon na lakdang sa miting kan health board ngonian na alas dos nin hapon.

Sa kahapotan kun igwa nang vaccine na pambakona laban sa dengue an oficina kan City Health, sinabi ni Borja na mayo pa kaini an ciudad mantang mahal an presyo cada bakona nagcacantidad nin P3,400.

Napag-araman man ni Rañola an ibang Pediatrician Clinic sa ciudad igwa na kaini, alagad dadarahon kan consejal sa miting kan health board asin sa Sangguniang Panlungsod kun kayang matagamahan nin fondo an mahal na presyo kan vaccine.

Inaabot nin P800 mil an gastos kan ciudad sa mga caso sa dengue para sa suplay nin bulong, fogging operation asin iba pang gagastosan.               (DPA)                                    




 

Share on Facebook
Share on Twitter
Please reload