NFA CSur nagsusuplay na nin bagas sa mga mercado

October 12, 2017

 

 

Pili, Camarines Sur -  Matapos kan limang bulan na nawara an suplay nin NFA rice sa mga mercado asin sa awtorisado kaining tiendahan sa mga barangay, buelta sa dating operasyon an ahencia sa pagdistribuer kan saindang bagas sa mga mercado.

Kan huring semana kan Septiembre ngonian na taon nag-abot na an saindang 140 mil na sakong suplay sa Camarines Sur na mga imported rice gikan sa opisina rehiyonal kan NFA Bikol sa Ciudad nin Legaspi na inangkat kan central office sa nasyon kan Vietnam.

Sa entrevista kan Bicol Mail ki NFA Assistant Provincial Manager Nora Follosco sinabi kaini na apektaran an saindang pagdistrubuer nin bagas puon kan bulan nin Mayo hasta kan Septiembre 2017  mantang atrasado an pag-angkat nin bagas kan gobierno nasyonal.

Sa laog kan nakaaging limang bulan igwa sana sindang 40 mil na sakong stock sa bodega na nakatagama encaso igwang calamidad asin para sa hospital kan gobierno, DSWD asin LGU alagad buelta naman sinda sa pagdistrubuer kaini sa mercado asin barangay.

  Dakul an naghahanap kan baratong presyo kan NFA rice, dai man sinda makahiro huli ta hinahalat an imported rice na magduong sa Puerto sa Tabaco, Albay.

  Kan mga nakaaging bulan dai sinda nagbabakal inaning paroy sa mga paraoma huli ta apektado kan mas halangkaw na presyo kan mga pribadong comprador na nagaabot sa P19 hasta P20 cada kilo mantang an saindang bakal kan paroy sa mga paraoma kun icocompara sa ahencia sagcod sana sa P17.20.

Encaso magbuelta an tamang presyo kan ahencia mapadagos sinda kan palay procurement, sabi pa ni Follosco.                                  (DPA)  



 

Share on Facebook
Share on Twitter
Please reload