P35-M haloy nang nakatagama para sa San Felipe-Calauag road

October 12, 2017

 

Preparado na an treinta y cinco milyon pesos (P35-M) na fondo kan lokal na gobierno kan Ciudad nin Naga para sa construksyon kan San Felipe-Calauag road, alagad an nakakaabala iyo an abalang pagsangat nin expropriation complaint sa corte nganing magamit an road right of way sa proyecto.

Si Consejal Vidal Castillo, pamayo kan Committee  on Infrastructure sa Sangguniang Panlungsod iyo an nagplano asin nagrecomendar sa SP ma-tolong taon na ngonian na 2017 na kaipuhan an San Felipe-Calauag road nganing mainaan an hibog kan trafico sa M.T. Villanueva Ave.

  Sa  ginibong  pagsukol kan City Engineer’s Office labi sa tres kilometros an laba kan propuestong bagong tinampo na nakakaabala sa pag-implementar iyo an atrasadong pagsangat nin expropriation complaint sa jusgado kan City Legal Office kan ciudad, sabi pa ni Castillo.

Si Bise Alcalde Nelson Legacion nagsabi na si ibang mga kagrogaring kan pribadong propriedad nag-uyon na sa proyecto kan ciudad mientras na kabale sinda sa makikinabang oras na matinampohan na an saindang lugar.

Pighahalat ninda an aksyon ni City Legal Officer Jun Bragais nganing isangat na an expropriation complaint asin magdalagan na an proceso kan caso sa jusgado.

Si ibang mga pribadong kagrogaring nin lote naguyon na agihan kan road right of way an saindang lugar alagad igwa pang iba an nagsasayuma kaya ngani an solusyon kan City Hall magsangat nin expropriation complaint.

An M.T. Villanueva Ave. inaagihan nin mga motorista gikan sa Tinambac, Calabanga, Bombon, Magarao, Canaman na an saindang ruta pasiring sa Pili, Camarines Sur asin vice versa, kun mabukasan na an tinampo sa San Felipe – Calauag road makakatabang sa trafico, sabi ni Consejal Castillo.    
    
ISYU SA RELOKASYON KAN MGA POSTE

Si Project Supervisor/Acting General Manager Nelson Lalas kan Casureco II nagcierto sa Sangguniang Panlungsod na saindang tataposon an inbentaryo kan mga poste sa sakop nindang mga banwaan na aagihan kan road right of way kan DPWH.

Alagad dai makataong bulan kun nuarin matatapos an saindang ginigibong validation kaibanan an personajes kan 2nd Engineering District kan DPWH sa Camarines Sur.

Nagpupoon pa sana an mga pig-iimplementar na road widening project an DPWH sa mga national road sa Ciudad nin Naga, si Consejal Castillo bilang pamayo kan Committee on Infrastructure sa SP nag-apelo na sa manijamiento kan Casureco II asin DPWH na magtarabangan na sa pagharali kan mga poste na ulang sa proyecto huli ta delicado pa sa mga aksidente sa motorista.

An DPWH nagtaong plaso sa Casureco II na dapat taposon an validation asin magsumiter kan saindang cuentada para sa gastos sa relokasyon kan mga poste na babayadan kan ahencia alagad kun aboton sa Agosto 2018 bako na nindang obiligasyon envez an mapasan na kan gatos iyo an cooperativa nin electricidad, sabi sa patanid ni Assistant District Engineer Richard Emmanuel Ragrario.

Dinagdag pa kan consejal kun nagdangod an Casureco II na naggibo na kutang amay nin inbentaryo dai na sinda titikapohon sa panahon.                  (DPA)







 

Share on Facebook
Share on Twitter
Please reload