Sektor nin transporte sa Bikol majuelga sa Lunes

October 12, 2017

 

Masabay an sektor nin transporte sa Bikol sa gigibohon na mahiwas na juelga sa nasyon kan mga operator nin jeepney asin van sa Lunes, Oktubre 16 nganing paralisaron an viaje kan mga PUV bilang protesta sa Jeepney Modernization Program kan Land Transportation Franchising and Regulatory Board (LTFRB).

Si Joel Pillogo, regional coordinator kan Piston Bikol  sa paagi nin entrevista sa telepono, nagsabi na sagcod sa 80 por ciento kan mga pampasajerong jeepney sa Kabikolan asin piglalaoman ninda an suporta kan mga van operator na magsabay sa juelga nganing ipaheling sa gobierno nasyonal na sinda nagkakasararo sa pagcontra sa iimplementar na policia kan ahencia.

Pang-iipit sa mga tios na chofer asin operator an policia kan gobierno na ibasura na an 15 años nang PUV na pueding pang gamiton para sa hanap buhay, sabi pa kan lider kan Piston.

Sinabi pa na tinatawan sana nin pabor kan LTFRB iyo an mga darakulang kapitalista nganing maribayan na kan saindang pig-iintrudocer na electronic jeepney asin solar panel na mahal an presyo na dai na kayang mabakal kan ordinaryong mga operator.

An sektor nin transporte sa Ciudad nin Naga asin Camarines Sur nagkapera nang veces dai nagsasabay sa mga transport strike, alagad segun sa Piston Bikol nagpahayag na an grupo digdi na magparticipar mientras na dakul man digdi an apektado.

Napag-araman ninda na igwang opisyal kan City Hall sa Naga an nagpatanid sa saindang grupo digdi na ipapacancelar an saindang franquicia alagad dai man sinda takot envez mapadagos na magsuporta, sa protesta sabi pa ni Pillogo.

Saiya pang nginaranan an Pistton Development Cooperative sa Naga na pinamamayohan ni Rafael Duque, aram nindang dai macooperar sa gigibohon na protesta mientras na midmid na harani sa City Hall.

An grupo ni Duque, kadakle mga trimobile na dai man apektado kan phase out sa jeepney.

Sa Camp Simeon Ola, si Regional Director Chief Supt. Antonio Gardiola nagpaluwas nang directiva sa mga PNP Provincial Director na magwarak nin mga personajes sa tinampo nganing maseguro an paz y orden sa maghapon na juelga.



 

Share on Facebook
Share on Twitter
Please reload