Waste-to-energy facility prioridad pa kan City Hall

October 12, 2017

 

Dawa  igwang  sanitary  land  fill  alagad  an  ambisyon  kan  lokal  na gobierno sa Ciudad nin Naga na dapat magkaigwa na digdi kan waste-to-energy facility idadagos giraray kan presenting opisyales lokal sa pamamayo ni Alcalde John Bongat.

Si Bise Alcalde Nelson Legacion, pamayo kan Sangguniang Panlungsod nagpahayag na prioridad kan ciudad idagos   an renewable energy project matapos saro sa nagkaperang mga proponente na nagsumiter kan saindang project proposal sa City Hall igwang existencia kan facilidad sa Ciudad nin Lapu-Lapu na perang taon nang nagpapadagos kan saindang operasyon.

Si Bise Presidente Leni Robredo iyo an nag-informar sa City Hall kan waste-to-energy facility na dapat maheling mismo an aktual asin existencia sa facilidad kan opisyales lokal kan ciudad, sabi ni Legacion.

Ini iyo an Aquilini Mactan Renewable Energy Inc. (AMBRE) na iyo an premirong waste-to-energy facility sa Filipinas na nagbugtak kan saindang facilidad sa Ciudad nin Lapu-Lapu na ginastosan nin P1.3 bilyon.

Ini an hinahanap kan City Hall sa mga proponente kun igwa sindang facilidad sa arin man na lugar sa Filipinas o sa ibang nasyon bakong sagcod sana sa ‘’drawing’’, sabi man ni Consejal Salvador Del Castillo pamayo kan Committee on Environment and Energy kan SP.

Sa record kan AMBRE, segun sa bise alcalde igwa na sindang kaparejong facilidad sa mga nasyones kan Washington, Oregon, New York, Taiwan, Canada, China, Hawai, Malaysia asin Korea asin premiro sa Filipinas an yaon sa Ciudad nin Lapu-Lapu.

Si Jesus Jayme Jr., presidente kan corporasyon iyo an nagsumiter kan saindang project proposal na narecibe kan opisina kan bise alcalde kan Lunes, Oktubre 9 na pigpunan nang orolayan sa SP.



OPISYALES LOKAL MAHELING KAN AKTUAL NA WASTE-TO ENERGY FACILITY   

Tanganing maheling ninda sa aktual asin existencia kan facilidad an opisyales lokal sa pamamayo ni Alcalde Bongat, Bise Alcalde Legacion mga consejales, Engr, Joel Martin kan SWMO, City Engr. Leon Palmiano IV, asin OIC ENRO Ramon Florendo nakatalaan magbisita sa Lapu-Lapu City sa Oktubre 28 nganing maheling an renewable energy.

An opisyales lokal pig-inbitaran ni Jayme kasabay kan nakatalaan na pagbisita ni Bise Presidente Robredo sa facilidad sa kaparejong petsa.

An AMBRE sa Lapu-Lapu igwa sanang hiwas na sarong hektarya na igwang kakayahan para sa 75 toneladang basura aroaldaw nganing makaproducir nin corriente.

An City Hall amay nang nag-aandam para sa sinambit na facilidad mientras na padagos pa an ginigibong proceso sa pag-implementar kan sanitary land fill sa Brgy. San Isidro.

Igwa nang diez hektarya lote an ciudad para sa basurahan na magagamit sana an 4.8 hektarya para sa SNL asin igwa pang mahiwas na espaso kun madagos an renewable energy project, sabi pa kan bise alcalde.

Piglinaw pa kan City Hall na maagi man giraray sa proceso sa subasta an pagpili ninda kan mga proponente sa waste-to-energy facility.

An ciudad enot nang nagkaigwa nin contrata sa CG Global Corporation kan taon 2011 para sa kaparejong proyecto alagad nagpalyar an corporasyon na ma-implementar an proyecto.

Huli kaini, an City Hall mapaseguro mapanday nin mga condiciones na maagi sa SP antes pinal na maglaog sa contrata sa sinambit na facilidad.                                                                                           (DPA)  





 

Share on Facebook
Share on Twitter
Please reload