Cooperativa sa Sorsogon, mantenido bilang multi-millionaire


An Gubat St. Anthony Cooperative (GSAC) sa Sorsogon padagos nangengenotan sa 678 actibong nagdadalagan na rehistradong cooperativa sa Cooperative Development Authority (CDA) sa Bikol na igwa nang P749.3 milyon na assets alagad dai pa pigdetalye an saindang net income. Ika-duwa sa multi-millionaire sa mga cooperativa sa Bikol iyo an Naga Imaging Center Cooperative (NICC) sa ngaran na serbisyo medikal na igwang P481.8 milyon na assets. Ini base sa listahan kan CDA Bikol hasta kan 2015 mantang igwa pa sindang panahon asin an iba pang rehistradong cooperativa na magsumiter kan saindang documentadong assets sagcod sa huring cuarto ngonian na taon. Si Grace Layosa, Assistant Regional Director kan CDA nagpahayag sa entrevista kan Bicol Mail an GSAC sarong multi-purpose cooperative na cincuenta años nang nagdadanay na nakatalaan pang magrecibe nin onra bilang outstanding small farmers na itatao kan Departamento de Agricultura. Tanganing maseguro asin mapaasenso an pagpadalagan kan sarong cooperativa an CDA nagkakaigwa kan saindang regular na pag-monitor asin pag-audit sa fondo kun sinda nag-iingreso asin kun nasa marhay na kamugtakan an saindang assets kaya ngani naghanap sinda kan Top Ten Cooperatives asin kaayon digdi iyo an minasunod; nasa ika-tolo iyo an Pinoy Lingap-Damayan Multi -Purpose Cooperative sa Catanduanes na igwang P304.7 million assets; ika-apat iyo an Basud Development Cooperative sa Camarines Norte na igwang P253.3 million assets; ika-lima – Baao Parish Multi-Purpose Cooperative na igwang P226.4 million assets; Ika-anom – Kooperatiba para sa Kaunlaran ng Lagonoy, CamSur na igwang P203.5 million assets; Ika-pito – Sorsogon Medical Mission Group Hospital and Health Services Cooperative sa Sorsogon na igwang P186.1 million assets; ika-walo - Countryside Multi-line Cooperative sa Camarines Norte na igwang P172.9 million assets; ika-siyam - CamSur Multi Purpose Cooperative na igwang P116.8 million assets; asin ika-sa mpolo – Camarines Sur Teachers and Employees Multi-Purpose Cooperative na igwang P115.2 million assets. Sinda anas dai nagdetalye kan saindang net income. Sa top ten cooperatives, an duwa parejong medical services na iyo an NICC asin Sorsogon Medical Mission Group Hospital asin an walo anas mga multi purpose cooperatives. Sa listahan hasta kan 2016, sinabi pa igwang 1,025 na nagpa-rehistro sa CDA Bikol asin ngonian na 2017 nadagdagan ini kan 32 na bagong nagpa-rehistro na igwang total na 1,057 hasta kan Septiembre 30, 2017. Pigdeclara kan CDA an 64 por ciento (678) kan 1,057 rehistrado bilang actibong nagdadalagan na cooperativa sa Kabikolan huli ta iyo an nakakasumiter kan mga documentos asin nasa marhay an saindang kamugtakan finansyal mantang an iba posibleng na-aabala sa pagcompleto kan mga papeles. An iba sagcod sana sa pagpa rehistro alagad igwa man nakapuon kan saindang operasyon perang taon nawawara huli sa mismanagement, sabi pa ni Layosa. An sarong organisasyon na igwang quince miembros asin P15 mil na kapital pueding mamukna bilang cooperativa. (DPA)