Zero hunger bill lusot na sa komite sa Congreso

October 19, 2017

 

Sarong congresista hali sa premir distrito kan Ciudad nin Davao asin kaalyado sa partido kan administrasyon nagpapadreno kan zero hunger bill sa Camara-Baja asin nakalusot na sa House committee on human rights dai palang nahahaloy.

Si Congresista Karlo Nograles, pamayo kan Committee on Finance and Appropriation sa Camara-Baja nag-atubang sa press conference sa Ciudad nin Naga kan Martes, Oktubre 17 nagsabi na kinakaipuhan tawan prioridad an problema sa kagutoman, pagtios sa paagi nin suficienteng suplay  nin pagkakan sa nasyon na puedeng maresolberan ini sa Filipinas sa laog nin sampolong taon matapos maaprobaran an propuestong ley.

An bill ni Nograles suportado kan National Food Coalition and Food First Information and Action Networtk (Fian) Philippines, na sarong lokal seksyon kan Fian International, na may advocacia sa deretso na magkaigwang bastanteng pagkakan sa cooperasyon kan Food and Agriculture Organization.

Kun makalusot asin maaprobaran an saiyang bill sagcod na maging ley, mapipiritan an gobierno na matawan prioridad an pangangaipo sa pagkakan. An kaparejong problema natawan nganing solusyon sa nasyon kan Brazil ta’no ta dai kayahon digdi sa Filipinas.

Digdi na magibo nin lakdang an gobierno na magpanday nin mga policia nganing resolveran asin taposon an problema sa kagutoman sa laog nin sampolong taon sa paagi nin pagcrear nin presidential commission, sabi pa.

 
P40-B pigtagamang fondo sa libreng matricula
sa SUCs

Sa kaparejong press conference kinumpirmar pa ni Nograles na saindang tinawan nin bastanteng fondo an libreng matricula sa mga estudiantes sa State Universities and Colleges (SUCs) na nagcacantidad nin P40 bilyon para sa 2018 national budget.


Ini matapos maaprobaran an Free Higher Education Act of 2017 na enot nang pigdudahan kan ibang sektor na posibleng dai kayahon kan gobierno na matagamahan nin dakulang fondo.


Nakatalaan mag-epekto an libreng matricula kan rinibong estudiantes sa SUCs sa school year 2018-2019 na dakulang bagay sa mga pobreng estudiantes na mayong kakayahan na magbayad nin matricula, sabi pa ni Nograles.

Sa libreng matricula dakul na jovenes an makakatapos kan saindang edukasyon sa tertiary level nganing makahanap tolos nin trabajo matapos kan saindang pag-escuela sa SUC.

An ibang sektor duda sa kakayahan kan gobierno na makatimos nin bilyones pesos para sa libreng matricula alagad an Chairman kan appropriation committee pigtawan nin prioridad nganing makabali sa General Appropriation Act of 2018 asin iimplementar na ini sa masunod na burokasan nin klase.

  Aprobado na sa Camara-Baja an 2018 national budget na nagcacantidad nin labi sa tres trilyon pesos na saro sa may dakulang prosupuesto iyo an programa sa edukasyon kan gobierno nasyonal.

Si Nograles, kaibanan ni Presidente Rodrigo Duterte kan magbisita sa Camarines Sur.                                                                            (DPA)



 

Share on Facebook
Share on Twitter
Please reload