Leni langkag na sa operasyon kan Infirmary hospital

October 26, 2017

 

Mabilog nin  Technical Working Group

Papangenotan ni Bise Presidente Leni Robredo an pagcrear kan Technical Working Group (TWG) nganing hanapan nin solusyon an problema sa abalang operasyon kan Calabanga Infirmary Hospital sa Brgy. Paolbo, Calabanga, Camarines Sur.

An Bise Presidente liwat nagbisita sa natapos na construksyon sa edificio kan hospital kan Oktubre 20 kaibanan si Congresista Gabby Bordado Jr.,  mga opisyales kan Departamento de Salud sa Bikol asin mga miembros kan Sangguniang Bayan kan LGU Calabanga, na nanghihinayang siya kan natapos na edificio na sagcod sa ngonian dai pa napapakinabangan.

Sa maabot na Oktubre 30, 2017 papangenotan kan bise presidente an miting na gigibohon sa munisipyo nganing magbilog kan TWG na siya mismo an magiging chairman, kaibanan an DOH Bikol, opisina kan gobernador kan Camarines Sur, opisina ni Congresista Gabby Bordado, Jr. kan tercer distrito, Provincial Health Office asin kan opisyales lokal nganing maghaman nin mga plano kun nuarin dapat maging operational an hospital sa tabang kan LGU asin kan DOH.

An hospital tuyong binogtak sa Brgy. Paolbo na harayo na sa centro kan banwaan nganing matabangan an mga pasyente sa hararayo asin bukid na barangay na dai na kaipuhan magdalagan sa hospital sa Ciudad nin Naga.

An edificio kan hospital narealisar kan panahon na congresista pa kan tercer distrito kan Camarines Sur si VP Robredo kan makakonsiger nin maabot sa P50 milyon sa administrasyon ni dating Presidente Benigno Aquino III mantang nagcierto man na matabang an Capitolyo Provincial sa pamamayo ni Gobernador Migz Villafuerte na matagama nin P50 milyon para sa personajes kan hospital.



ALOKASYON PARA

SA 2017 PREPARADO NA SA DOH

Kan mag-inspeksyon an bise presidente sa laog kan edificio kan Infirmary Hospital yaon man si Dr. Rey Millena asin iba pang opisyales kan DOH na nagkumpirmar na igwa na kuta sindang budget allocations ngonian na 2017 para sa sinambit na hospital  kabali digdi an mga facilidades alagad dai man  sinda makahiro huli kan kawaran nin personajes.

Afuera pa kaini, pigcierto kan DOH Bikol na igwa nang alokasyon para sa masunod na taon 2018.

Sinabi kan DOH na saiya nang napag-araman na pigpublikar na kan Capitolyo Provincial an mga plantilya posisyon sa ibubugtak na mga empleado sa hospital.

Dapat magtarabangan na an opisyales lokal, DOH asin Capitolyo Provincial kaya ngani nagdesisyon an bise presidente na magbilog nang TWG.

Sa pigtalaan na miting sa Oktubre 30 nakatalaan inbitaran si Dr. Butch Borja kan City Hall asin an pamayo kan Tinambac Infirmary Hospital nganing magheras kan saiyang kaaraman sa pagpuon asin pagpadalagan kan sarong Infirmary Hospital.                                       (DPA)                                




 

Share on Facebook
Share on Twitter
Please reload