NCPO nakaalerto sa aldaw kan undas

October 26, 2017

 

Sarong semana antes kan undas sa Noviembre uno an Naga City Police Office (NCPO) preparado na kan saindang plano sa seguridad asin sa trafico nganing maseguro an pagmantenir kan paz y orden  mantang nakabandera an full red alert.

Si City Director Sr. Supt. Jonathan Panganiban nagpahayag sa meet the press sa City Hall na mawarak sinda nin mga miembros kan PNP sa mga pribado asin sa pampublicong camposanto asin magkakaigwa nin regular na paglibot an motorcycle patrol sa mga subdivision nganing dai makabuelo an maprobar na magsalakat sa mga harong na mayong tawo huli ta sibot sa mga camposanto.

Katuwang kan NCPO an Public Safety Office (PSO) na saro sa saindang trabajo iyo an pagmantenir kan bulos kan trafico sa mga barangay na igwang camposanto an saindang lugar alagad hahagadon ninda an cooperasyon kan opisyales de barangay na magtabang an barangay tanod.   

Liwat nindang iimplementar an liquor ban asin bawal na pagbitbit nin mga patarum sa laog kan camposanto na parating nagpapatanid kaini an PNP alagad kulang sa higot na implementasyon.

Nakatalaan na magbugtak nin  public assistance center harani sa mga camposanto.

Sinabi man ni Rene Gumba, jefe kan PSO na liwat nindang binuhay an Joint Operation Center asin sa maabot na Oktubre 28 bukas na an saindang Central Communication Center na andam magrecibi nin mga reclamo asin mga emerhencia na kaipuhan an aksyon kan rescue team.

Gigibohon na one way an bulos kan trafico sa Balatas pasiring sa duwang pribadong camposanto na iyo an magiging entrance asin magiging exit an haling Barangay San Felipe pasiring sa Peñafrancia Avenue.    

Sa Bicol Central Station madestino nin dugang na kapupulisan asin PSO mantang dakul an nagaarabotan na pasajeros hali sa manlaen-laen na provincia asin ciudades.                                                                                        (DPA)

 

Share on Facebook
Share on Twitter
Please reload