SA MODERNISASYON KAN PNR Pag-utang sa China disventaje sa Pinas

October 26, 2017

 

Dakulang disventaje sa gobierno kun ipapadagos kan administrasyon ni Presidente Duterte na mag-utang sa nasyon kan China nin P175 bilyon nganing iyo an gamiton na fondo sa iimplementar na reconstruction kan Bicol Express huli kan halangkaw na ipapatong na por ciento cada taon na igwa man nin ibang nasyon na nag-oopresir nin mas hababang por ciento.

Saro na sanang direksyon an paliwanag kan DOTr dai nagheheling kan ibang opsiyon na paborable sa gobierno na dakula an posibilidad na malugmok sa utang an Filipinas.

Ini an tuyaw kan ibang sektores na nag-atendir sa ginibong forum on PNR modernization na mayor na nagpaliwanag si Usec Cesar Chavez kan Department of Transportation (DOTr) na haros tindido na an saindang panindugan na dakulang bagay sa Filipinas asin sa proyecto sa perrokaril nganing marealisar na an reconstruction kaini na kayang matapos sa laog kan termino ni Presidente Duterte.

Si Beda Priela, dating presidente kan Metro Naga Chamber of Commerce and Industry asin Consejal Mila Raquid-Arroyo kan Sanggunian Panlungsod kan Ciudad nin Naga, nagpahayag sa entrevista kan Bicol Mail na dai mahahali an posibilidad

na malugmok an Filipinas sa pagkaka utang na arog kan nangyari sa Sri Langka.

An Sri Langka, pinautang kan China nin dakulang cantidad para sa proyecto kan saindang aeropuerto alagad kan dai na nakakabayad pig-take over kan China an manijamiento kan aeropuerto.

Sarado na an paliwanag kan DOTr na mag-utang sa China dawa halangkaw an ipapatong na por ciento, disganado sinda sa resulta kan forum na dapat pigconsulta giraray an publiko kun paborable sa gobierno an pag-utang sa may halangkaw na interes cada taon.

Babayadan an utang sa laog nin veinte taon.

An duwang opisyal dai man nagcocontra na mag-aprobetsar an Pilipinas sa Overseas Direct Assistant (ODA) nganing maimplementar na an reconstruction kan Bicol Express, alagad dapat magpili nin ibang nasyon na mas hababa an ipapatong na por ciento per anum.

Kun an nasyon kan China mapatong nin dos por cientong interes sa uutangon na bilyones pesos, alagad an nasyon kan Japan nagpapa-utang man na napatong sana nin 0.5 por ciento asin igwa pang ibang nasyon na nag-oopresir nin hababang por ciento arog kan Korea na zero interest asin yaon pa an Estado Unidos, sabi pa.

VP ROBREDO
PABOR SA PPP

Si Bise Presidente Leni Robredo na haloy nang pigtutulod an modernong perrokaril na nagtaong mensaje sa forum nagsabi mas paborable sa gobierno an private-public-partnership (PPP) huli ta posibleng malakma an Filipinas sa halangkaw na interes na ipapatong kan China.

Kan panahon ni dating Presidente Benigno Aquino III, igwa nang nakatagamang P171 bilyon asin si plano kun iimplementar an modernong perrokaril dapat maglaog sa PPP.

An ibang mga sektor pabor sa PPP alagad saro na sana an plano kan DOTr iimplementar an proyecto kan modernong PNR sa paagi kan ODA na mautang sa may halangkaw na interes.

Pigpaliwanag ni Chavez na binaba sa P151-B an fondo hali sa dating P171-B huli ta base sa saindang survey inaabot nalang nin onse mil an pasajeros aroaldaw.

Alagad dai man digdi uyon si Arroyo asin Priela huli ta kun marealisar an regular an viaje kan tren masobra pa sa pigsasabing survey kan DOTr.

An Bicol Express na dating hali sa Tutuban PNR Station alagad mahali na sa Paco, Manila sundo sa Ciudad nin Legazpi asin sa Sorsogon.

An terminal ibabalyo na sa Pili, Camarines Sur bako na sa Ciudad nin Naga mantang sa Albay hali sa Ciudad nin Legazpi ibabalyo na sa Camalig, sabi pa kan DOTr.

An opisina ni Congresista Gabriel H. Bordado Jr., Naga Parochial School Batch ’67 asin Ateneo de Naga 1971 Association Inc. iyo an nag-iniciar kan sinambit na forum na saro sa kahagadan ninda na dapat gibohon nang standard gauge an riles envez kan loma nang narrow gauge oras na iimplementar an proyecto sa perrokaril.               (DPA)

 


 

Share on Facebook
Share on Twitter
Please reload