HULI KAN NAGTIRIS NA DAGA: Viaje sa Sagñay, CSur-Tiwi, Albay paralisado

November 3, 2017

 

Saro gadan, duwa iredo

Paralisado an transportasyon na may rutang Sagñay, Camarines Sur asin Tiwi, Albay puon ngonian na Juevez, Noviembre 2 matapos magtiris an halangkaw na daga digdi huli kan perang aldaw na pagbulos nin uran na nagresulta nin sarong gadan asin duwang iredo na nag-eestar sa gilid harani sa national road.

An 3rd Engineering District kan Department of Public Works and Highways (DPWH) sa Partido Area sa paagi ni District Engr. Gima Timbag tolos nagpaluwas kan saindang mga heavy equipment asin ibang mga contratista sa Camarines Sur asin Albay nganing magtarabang sa pagharali kan naghuros na daga asin natombang mga kahoy sa tahaw kan tinampo.

An biktima si Ryan Lasmarias, 32 años tinamaan kan nagbagsak na hollow-block na iyo an naging causa na binawian nin buhay mantang an mga iredo pigmidmid na sinda Philip Olaño, 85 años, taga Barangay Bongalon asin si Christy Bantal, 15, kan BarangayTurage na parejong pigdalagan sa Infirmary Hospital.

Nagtiris an daga mga ala una nin maagahon, Noviembre 2 na dai tolos nakaresponde an tawo harani sa lugar kan insidente.

Katorceng mga warak-warak na pagtiris nin daga sa mga Barangay kan Bungalon, Paalinan, Turage asin Sibagwan na iyo ngonian  an  pigtatarabangan kan personajes kan DPWH asin nagkaperang heavey equipment nin mga contractor hali sa CamSur asin Albay na voluntad nagpasiring sa lugar nganing mahali an mga ulang sa tinampo.

Inabot nin tolong aldaw si halawig na mga pagbulos nin  makusog na uran na iyo an naging causa kan paghuros kan daga pasiring sa tinampo, sabi kan DPWH.

An Sagñay-Tiwi road iyo an pig-aagihan kan mga pampasajerong sasakyan haling Partido District asin iba pang mga banwaan pasiring sa  Tiwi, Albay asin vice versa.

Sagcod sa sinusurat an baretang  ini  dai  pa   makatao nin aldaw si Engr. Timbag kun nuarin puedeng agihan nin vehiculos an sinambit na lugar alagad saiyang pigcierto na dai matatapos an semana bubukasan na liwat an tinampo nganing buelta an viaje kan Sagnay asin Tiwi.

Manga motorsiklo asin trimobile iyo muna an nakakaagi.               (DPA)  
 

Share on Facebook
Share on Twitter
Please reload