P3-B alokasyon sa mga infra project ni LRay para sa 2018

November 3, 2017

 

An second congressional district kan Camarines Sur nagtagama nin P3 bilyon na alokasyon sa mga proyecto sa infrastractura para sa taon 2018 kabali digdi an bubukasan na Camarines Sur Express Way na maaging San Fernando hasta sa Pili, CamSur nganing dai na mag-agi an mga motorista kun dai man sanang tuyo sa Ciudad nin Naga asin dai pa makakadagdag sa gabat nin trafico.

Si Congresista LRay Villafuerte nagpahayag na dakulang fondo an saiyang masasakdo nurong taon na kaayon na sa General Appropriation Act of 2018.

Dakulang bagay an pagiging vice chairman niya kan appropriation committee sa Camara-Baja nganing bilyones pesos an madarang fondo sa saiyang distrito na kinababalihan kan municipalidades kan Pasacao, San Fernando, Pamplona, Libmanan, Gainza asin Milaor.

Kabali sa papabulosan nin fondo iyo an propuestong tulay na masumpay haling Libmanan na maaging Magarao asin Canaman na yaon sa laog kan tercer distrito kan provincia.

Kun marealisar an tulay dakulang bagay sa mga motorista  asin pasajeros huli  ta  mapapalipot   an viaje haling Libmanan pasiring sa Ciudad nin Naga na iyo an centro kan edukasyon asin negosyo sa Camarines Sur asin Bikolandia.

 An tulay makakatabang pa sa mga haling Calabanga na maviajeng Manila na dai na kaipuhan mag-agi sa Ciudad nin Naga asin mapalipot pa kan oras nin viaje.

Afuera kan dakulang fondo para sa sunod na taon, an congresista nagbuyagyag na igwa siyang alokasyon na P1.2 bilyon ngonian na taon 2017 para sa mga classrooms sa pampublikong escuelahan mantang nagkukulang pang mga cuarto an Departamento de Edukasyon (DepEd) saiyang sakop na distrito.

An congresista kan segundo distrito miembro kan Nationalista Party na kaalyansa kan PDP-Laban na iyo an partido kan administrasyon Duterte.                                                                                                       (DPA)






 

Share on Facebook
Share on Twitter
Please reload