SA CIUDAD NIN LAPU-LAPU: SP nagbisita sa operasyon kan waste to energy facility

Nagkapera nang mga proponente an nag-oopresir sa City Hall na andam magbugtak nin waste to energy facility alagad sagcod sana sa drawing an saindang pigpepresentar na mayo nganing nag-eexister sa Filipinas. Si Bise Alcalde Nelson Legacion, mga consejales na sinda Cecilia de Asis, Gregorio Abonal, Mila Raquid-Arroyo, Julian Lavadia Jr. Ray-An Rentoy, Joselito del Rosario asin Salvador del Castillo, nakumpirmar asin naheling an operasyon kan Aquilini Mactan Renewable Energy (AMBRE) Inc. sa Ciudad nin Lapu-Lapu sa ginibo nindang pagbisita sa lugar kaini kan Oktubre 28 na presente si Bise Presidente Leni Robredo na juespe de honor sa sarong actividad. Kabali sa grupo kan bise alcalde iyo si Engr. Joel Martin, pamayo kan Solid Waste Management Office asin iba pang opisyales lokal. Kan Agosto 12, 2017 nagpuon na an partial operation kan AMBRE asin sa masunod na mga bulan magiging full operation an bilog na planta na namumugtak sa sarong hektarya lote, sabi ni Legacion. An facilidad sa Ciudad nin Lapu-Lapu ginastosan kan companiya nin P1.3 bilyon. Sinabi pa na gasification an operasyon kan planta na kinakaipuhan an 75 toneladang basura aroaldaw na maproducer nin 3 megawatts na corriente. Magiging paborable sa City Hall an proyecto mientras na gastos gabos kan investor alagad an obligasyon sana kan lokal na gobierno iyo an pagkolecta kan basura, sabi pa kan bise alcalde. An AMBRE, na igwang Canadian base mabugtak pa kan kaparejong planta sa Ciudad nin Cebu, Calabarzon asin isusunod an Ciudad nin Naga na nakatalaan magbisita digdi an mga ingeniero kan companiya nganing magpresentar kan saindang propuestong waste to energy facility. An presidente kan corporasyon iyo si Jesus Jayme Jr. nakaolay kan opisyales lokal kan City Hall sa pangenotan ni Legacion. Afuera pa kaini, igwa pang kaparejong facilidades sa nasyones kan Oregon, Washington, New York, Taiwan, Malaysia, China, Hawai asin Korea. Kun magkasundo sa proyecto an AMBRE asin LGU Naga, ibubugtak an planta sa Barangay San Isidro na kataid an dai pa napupunan na patrabajo kan Sanitary Land Fill. Nagtutubod an bise alcalde na marerealisar an proyecto matapos enot nang nagpalyar an CG Global Corporation. (DPA)