2 Nigerians dakop kan PDEA CamSur, PDEA Region 4-A

November 10, 2017

 

Apat na aldaw matapos madakop an apat na sindicato sa droga sa Almeda Highway, Concepcion Grande, Ciudad nin Naga hali sa Metro Manila nadakop kan pinagsarong fuersa kan PDEA Camarines Sur asin PDEA Region 4-A an duwang Nigerians na tinukdo kan babae na sindicato sa droga, Olivia Encinas y Salinas na iyo an nagsusuplay sa saiya nin shabu nganing ibagsak sa Ciudad nin Naga.

An pinagsarong elementos kan PDEA CamSur Provincial Office, na pinangenotan ni Director Christian Frivaldo asin PDEA Region 4-A na pinangenotan ni Director Archie Grande tolos nagconducir nin follow-up operation sa paagi nin buy-bust operation contra sa duwang Nigerians na sinda Solomon Lewi Anochiwa, 34 años, may agom, residente kan Lancaster New City Subdivision, Kawit, Cavite asin Desmond Chima Ozomo, 35 años, may agom asin residente kan Raya Garden, Bicutan, Parañaque.

An duwa tolos pigramalan matapos magpabakal  kan  maabot sa sarong kilo shabu sa paagi  kan ‘’undercover’’ na PDEA agent sa Centennial Road, Kawit, Cavite.

Pigbuyagyag kan PDEA na naging positibo an saindang operasyon kasunod kan pagtoga ni Olivia Encinas y Salinas, na saro sa apat na nadakop sa Ciudad nin Naga sa buy bust operation kan nakaaging Noviembre 4, 2017 an saiyang pigkukuanan nin suplay nin shabu iyo an sinambit na duwang Nigerians.

Duwa sa mga kaibanan ni Encinas na nadakop sa Naga na sinda Joel Saut y Alpanuso, 35 años, asin asin si Alvin Andaya y Saut, 37 años, parejong residentes kan Amadeo, Cavite na an mga nadakop na duwang dayuhan nag-eerok man sa Kawit, Cavite.



 

Share on Facebook
Share on Twitter
Please reload