70% kan evacuees habo nang magpuli sa Marawi

November 10, 2017

 

Tapos na an guerra sa Ciudad nin Marawi alagad maabot sa setenta (70) por ciento kan mga familia nin evacuees na yaon sa Ciudad nin Naga mayo pa sa plano na magbuelta sa saindang lugar asin an iba kun maka-establiser nin anom na bulan bilang residentes na kan ciudad planong magparehistro sa Comelec nganing digdi na magboto.
Si Mike Mustapha,
 pamayo kan Maranao Guild for Solidarity Inc. sa Ciudad nin Naga nagpahayag sa Bicol Mail mas prioridad na kan 70 por ciento o 30 familia sa 43 na familia na nakapadpad digdi mas pigmamawot na maghanap buhay nalang sa Naga huli ta matuninong an lugar na ini asin tinatawan pa nin ayuda kan lokal na gobierno.

Sinabi ni Atty. Maico Julia Jr. Election Officer kan ciudad nagsabi kaipuhan an anom na bulan na residency sa sarong barangay nganing makarehistro asin akoon bilang votante alagad ngonian na voters registration puon kan Noviembre 6 hasta 30 prohibido an pagbalyong lugar nin mapalistang votante.

Igwang total na 176 na persona sa 43 na familia asin an 30 por ciento kaini naghahace na makapuli na sa saindang lugar sa Ciudad nin Marawi matapos maaraman ninda na tapos na an guerra kan gobierno contra sa mga teroristang Maute ISIS asin idineclara nang liberated ni Presidente Rodrigo Duterte an sinambit na ciudad.

Mas omaw kan mga evacuees an Ciudad nin Naga huli ta tinatabangan sinda kan City Hall mala ngani pinautang pa nin tig-a P5 mil nganing gamiton bilang kapital sa sadit na negosyo.

Alagad si ibang mga evacuees na nakapadpad sa Ciudad nin Legaspi, Daraga, Albay, Ciudad nin Iriga asin Daet, Camarines Norte mayong tinataong ayuda an LGU.

Sinabi ni Mustapha na dakula an saindang pasasalamat sa lokal na gobierno sa pamamayo ni Alcalde John Bongat huli ta dai pinabayaan an mga evacuees kan bagong magsalta sa ciudad sa paagi kan naitaong mga ayuda kan City Social Welfare and Development Office ( CSWDO) kan City Hall.

Kinumpirmar ni Ms Annabel Vargas, jefe kan CSWDO na bako lang pagkakan an tinao nindang ayuda envez gamit sa kusina mantang an pagpautang nin cantidad P5 mil na agi sa PESO Office na pinamamayohan ni Roel Oliver.

Sinabi pa kan lider kan Muslim sa ciudad na kadakli kan mga evacuees nakidagos sa saindang mga kanya-kanyang partidaryos asin mga kamidmid  sa Brgy. Lerma, Abella asin an iba yaon sa laog kan Muslim Compound sa Brgy. Concepcion Pequeña.

Nagkapera sa mga familia pigpa-enroll an saindang mga aki sa elementarya sa escuelas publika asin igwang  nag-eescuela sa colegio.

Si Mustapha, 17 años nang nag-eerok sa Naga asin tubong Marawi City alagad digdi na nag-eestar sagcod nagkaigwa nang familia.                     (DPA)  



 

Share on Facebook
Share on Twitter
Please reload