P6-M shabu nakonfiscar kan PDEA sa 4 na dorogista

Liwat naman nakapuntos an Philippine Drug Enforcement Agency (PDEA) sa Camarines Sur sa dakulang nagsusuplay nin droga sa Bikol matapos madakop an apat na persona asin nakakonfiscar nin droga na nagcacantidad nin P6 milyon sa ginibong anti-drug operation kan Noviembre 4, alas 8:00 nin banggui sa Almeda Highway sa Barangay Concepcion Grande, Ciudad nin Naga. Ika-anom na an operasyon na ini kan PDEA digdi sa Camarines Sur matapos bawion na sa PNP an guerra contra droga na mayong insidente nin nabadil laban sa mga suspeksado o maging sa lado kan awtoridad. Si Loida Malanyaon, assistant regional director kan PDEA Bikol nagpahayag sa press conference na consideradong dakulang nagsusuplay nin droga sa Bikol asin Visayas an mga nadakop na sinda Olivia Encinas, 60 años, kan Ciudad nin San Pedro, Laguna; Joel Saut, 35; Alvin Andaya, 37, parejong nag-eestar sa banwaan nin Amadeo, Cavite; asin si Rodigundo Celis, 34, chofer kan taxi kan brgy. Tipas sa Ciudad nin Taguig. Si Encinas, iyo an maydara kan droga gikan sa sarong inmates sa National Bilibid Prisons mientras na anas nagtuturokdoan an mga suspetsado asin nagpapahimotik sa pagiging envuelto sa transaksyon sa droga. Sinda sinangatan na nin caso sa pagbalga kan Section 5, kan Acta Republica 9136 o mas midmid sa Comprehensive Dangerous Drugs Act of 2002. An PDEA Camarines Sur sa pamamayo ni Vidal Bacolod iyo an nangenotan sa operasyon sa paagi buy-bust operation sa sarong kilo nin shabu na may street value na P6 milyon. An mga suspeksado nag-viaje hali sa Manila lunad sa H2C taxi (UOY-683 dara an apat na dakulang plastic sachet na may laog nin shabu. Segun sa PDEA, nakipag-transaksyon an saindang poseur-buyer haling Manila sagcod na nagkasurondo na darahon sa Naga an droga. Si Gundo, nagpahimotik na kabali siya sa sindikato sa droga huli ta arkilado sana man an saiyang taxi.