PAG-UTANG FONDO SA MODERNISASYON KAN PNR: DOTr kaipuhan maghampang sa konsultasyon

An Sanggunian Panlungsod kan Ciudad nin Naga nanindugan na dapat dangugon kan Department of Transportation (DOTr) an gabos na stakeholders sa paagi nin konsultasyon sa isyu kan iimplementar na reconstruction kan Philippine National Railways Bicol Express alagad uutangon an bilyones pesos na fondo sa China na nagpapatong nin halangkaw na interest rate per annum. Sa sesyon regular kan SP kan Martes, Noviembre 7 inaprobaran an resolucion na pigtulod ni Consejal Mila Raquid-Arroyo asin pigsegundaran ni Consejal Julian Lavadia Jr. nganing hagadon ki DOTr Secretary Arturo Tugade na dapat magpaapod nin konsultasyon sa stakeholders nganing ipadagos an orolay sa iimplementar na proyecto sa perrokaril na dapat bakong disventaje sa gobierno kan Filipinas. Mawot malinawan kan SP kun tano ta mas pinaboran kan ahencia an Overseas Direct Assistance (ODA) apesar na mas paborable sa gobierno an public-private partnership (PPP) asin naghahapot pa kun tano pinili na mag-utang nin P175 bilyon sa China na masingil nin 2.0% interest rate per annum mantang puede man mag-ODA sa gobierno kan Japan na mapatong sana nin 0.5% interest rate per annum. An kopya kan resolucion papadarahan an mga LGUs sa Bikol nganing i-adaptar kan mga sanggunian asin dapat padarahan si Presidente Rodrigo Duterte, Bise Presidente Leni Robredo asin Regional Development Council sa Bikol. Sa privileged speech ni Consejal Lavadia, saiyang hinagad ki Congresista Gabriel H. Bordado Jr. kan tercer distrito na dapat sa masunod kaining privileged speech sa pagbuelta sa sesyon sa Camara Baja dapat ipaabot an saindang sentimiento asin panindugan kan stakeholders digdi na dai uyon na mag-utang an satong gobierno sa nasyon na mapatong nin halangkaw na interest rate per annum. Sa enot na nagluwas na plano an gobierno kan Filipinas mautang sa China nin P151.3 bilyon para sa modernisasyon kan perrokaril. Alagad sinabi ni Lavadia sa saiyang cuentada kun sa 2.0% interest rate per annum may babayadan an gobierno nin P3.026 bilyon sa interest pa sana per annum kun icocompara sa Japan na nag-oopresir sana nin 0.5 interest rate per annum magbabayad sana an gobierno nin P756 milyon. An utang babayadan sa laog nin viente taon. An isyu sa halangkaw na ipapatong na interest rate kinumpirmar ni Asec Cesar Chavez kan DOTr kan saiyang ipaliwanag an reconstruction kan PNR Bicol Express sa ginibong Forum on PNR Modernization na pig-iniciar ni Congresista Bordado, Naga Parochial School Batch ’67 asin Ateneo de Naga 1971 Association Inc. Dai bensido si Consejal Arroyo sa pigsasabing survey na maabot sana sa 11,000 an pasajeros kan PNR aroaldaw na ginibo ini dai pa nagdadalagan an viaje kan Bicol Express. Si Bise Presidente Leni Robredo na nagtaong mensaje sa sinambit na forum nagpatanid na posibleng mabangkaruti an gobierno kun ipapadagos an ODA sa China na mas paborable sa gobierno an dating plano kan NEDA na iimplementar an modernisasyon kan perrokaril sa paagi nin PPP.