Kgd. Castillo saludo sa PDEA CSur

November 17, 2017

 

Saludo an sarong miembro kan Sangguniang Panlungsod sa sunod-sunod na operasyon contra sa ilegal na droga sa Ciudad nin Naga asin Camarines Sur kan Philippine Drug Enforcement Agency (PDEA) na dakul an nadadakop asin mayong itinutomba.

‘’Puede man palan labo-labo an operasyon na mayong nagagadan, gulpi nadadakop na mayong binabawian nin buhay. Good job PDEA,’’ sabi ni Consejal Vidal Castillo.

Kan dai pa hinahali sa Philippine National Police an campaña asin guerra sa droga susog sa record kan PPO Camarines Sur labi na sa cuarenta an nagadan na kadakli lista sa dahon asin kaayon na digdi si mga pigtutubodan biktima nin extra judicial killings.

Si Castillo, antes nagtukaw bilang regular na miembro kan SP naging pamayo kan Liga ng mga Barangay sa Ciudad nin Naga asin chairman kan Barangay Anti-Drug Abuse Council sa Barangay Calauag.

Igwang mga ginibong operasyon an PNP kaidto sa Ciudad nin Naga maging sa laog kan saindang barangay na nagkakadarakop an mga suspechadong dorogista alagad mayong nagagadan huli sa sahot na nagtomang sa awtoridad. Nangyari an mga akusasyon sa extra judicial killings sa administrasyon ngonian ni Duterte.

Alagad sa PDEA Camarines Sur dai pa ngani na sarong bulan matapos ibuelta sa sainda an paglapag contra sa mga envuelto sa ilegal na droga dakul na an saindang acomplisimiento na mayong itinumba asin dakula pang cantidad nin shabu an saindang nakonfiscar, sabi pa ni Castillo.

Kan nakaaging semana an simbahan asin manlaen-laen na sektores sa Ciudad nin Naga asin iba pang ciudades sa nasyon nagkaigwa nin sarabay na prosesyon para sa pangapodan sa gobierno na may titulong ‘Stop the Killings. Start the Healing’, an misyon ngonian kan PDEA Camarines Sur bagay sa pangapodan kan simbahan, segun pa sa consejal.

Sa Naga City Police Office, sinabi ni City Director Sr. Supt. Jonathan Panganiban dawa yaon na sa PDEA an misyon sa droga alagad an saiyang liderato magpapadagos an campaña laban sa sinambit na ilegal na actividad.                                                                                         (DPA)



 

Share on Facebook
Share on Twitter
Please reload