Para sa Christmas bonus kan empleados: P3.4M idinolag kan guwardiya kan LGU

November 17, 2017

 

Naging bodyguard kan mga nakaaging alcalde asin padagos na pigtitiwalaan kan bagong administrasyon kan lokal na gobierno kan Tinambac, Camarines Sur alagad iyo man sana an naglalay kan P3.4 milyon na ibabariwas na bunos kan LGU para sa 10 opisyales lokal asin 115 empleados matapos i-withdraw kan tesorero sa bangko an sinambit na cantidad.

Si Alcalde Ruel Tuy asin OIC Treasurer Ma. Teresa Hermogeno y Betito nag-atubang kasoodmang aga sa press conference nganing ibuyagyag asin kumpirmaron an sinambit na insidente na nginaranan an bodyguard na si Melchor Abrazado, quince años nang empleados kan munisipyo.

Sinabi kan jefe ejecutivo na haloy na nindang pigtitiwalaan si Abrasado na iyo an nagiging bodyguard kan saindang tesorero kun na withdraw nin dakulang cantidad sa bangko sa Ciudad nin Naga alagad biglang nawara matapos mapugolan an dakulang cantidad.

Hahalaton kan LGU an resulta kan investigasyon kan PNP asin National Bureau of Investigation mientras na makakatabang sa caso iyo an footage kan CCTV camera kan Land Bank of the Philippine, Naga Branch na maheheling digdi kun panong nagdulag an bodyguard asin kun posibleng may kaibanan nin iba.

Nakatutok muna an investigasyon kan mga awtoridad ki Abrazado. An esposa ni Melchor nag-atubang na sa jefe ejecutivo nganing ipasabot na sagcod kasoodma dai pa nagpupuli an saiyang esposo sa saindang familia matapos kan sinambit na insidente.

Sa estorya ni Tesorero Hermogeno an insidente nangyari mga alas 10:00 nin aga, Martes, Noviembre 14 kan ma-i withdraw niya an milyones pesos pinalaog kaini sa brown na backpack ni Abrazado na naheling niya pa kan paluwason sa bangko kan LBP kan magsunod siya paluwas biglang nawara.  Kaibanan niya an choper kan saiyang service vehicle asin saro pang staff  na mayo man naginibo

Inapodan niya tolos sa cell phone kun haen na, alagad dai nagsisimbag sagcod inabot nin sarong oras asin dagos nang pigsombong sa Naga City Police Office asin pinaabot sa kaaraman ni Alcalde Tuy.    

An mga opisyales lokal kabali an budget officer asin OIC treasurer magkakaigwang orolay nganing maghanap nin solusyon kun sain makua nin cuarta nganing magtaga min fondo para sa bunos kan empleados asin opisyales lokal.    

Sa PNP Camarines Sur, si Provincial Director Jerry Bearis nagsugo na sa NCPO asin Tinamac Municipal Police Station na magtarabangan na sa investigasyon sa caso asin paghanap sa nagdolag na empleado. (DPA)






 

Share on Facebook
Share on Twitter
Please reload