P200k premyo kan LGU sa bodyguard na nagdulag P3.4M

November 23, 2017

Tinambac, Camarines Sur - Sa pagtubod kan lokal na gobierno kan banwaan na ini, an Sanggunian Bayan nagpasar na nin resolucion na nagtataong awtorisasyon sa saindang alcalde asin tesorero na magpaluwas nin fondo na nagcacantidad P200 mil bilang pabuya sa siisay man na makakadakop asin makakatukdo sa bodyguard kan munisipyo na idinolag si cuartang nagcacantidad P3.4 milyon para sa Christmas bonus kan opiyales lokal asin empleados kan LGU.

An SP sa pamamayo ni Bise Alcalde Rodel Velarde nagkasararo na magpasar kan sinambit na resolucion mantang sagcod sa ngonian dai pa nagsusuko sa awtoridad asin dai pa nadadakop an bodyguard kan munsipyo na si Melchor Abrazado.

Naging unanimous an resolucion mientras na kabali sa apektado na dai pa nakakarecibe nin bonus iyo an mga consejales, bise alcalde asin alcalde.

Si Alcalde Ruel Tuy, piglalaoman na pipirmahan tolos an resolucion nganing mag-andam kan sinambit na cantidad an saindang tesorero na si Ma. Teresa Betito Hermegino.

Sa ngonian an opisyales lokal pig-aadalan pa kun sain makua nin fondo karibay kan dinolag na dakulang cantidad na posibleng kuanon sa calamity fund nganing makarecibe na nin Christmas bonus an saindang 115 empleados asin 11 opisyales lokal.

Napag-araman na pig-aandam na  kan LGU an isasangat na caso sa saindang empleado na nagdulag nin milyones pesos.

An cuarta pig-withdraw sa Land Bank of the Philippines sa Ciudad nin Naga ni tesorero Hermegino alagad matapos macobra an cash na P3.4-M na tolos nilaog sa bag pinadara ki Abrazado alagad envez na ilaog sa saindang lunadan nganing magpuli na sa Tinamabac, CSur biglang nawara lalay an dakulang cantidad.


 

Share on Facebook
Share on Twitter
Please reload