Budget sa re-orientation sa Naga Airport hagad ireconsiderar kan senado

Kasunod kan kumpirmasyon ni Bise Presidente Leni Robredo na dai kabali sa national budget sa 2018 an re-orientation kan Naga Airport sa Pili, Camarines Sur, an Sanggunian Panlungsod kan Ciudad nin Naga nagpasar nin resolucion na hinahagad sa Senado na i-reconsiderar an budget para sa modernisasyon kan aeropuerto sa Camarines Sur. An SP na pinamamayohan ni Bise Alcalde Nelson Legacion bilang presiding officer nagkasararo na suportaran an resolucion na pigtulod ni Consejal Julian Lavadia Jr sa ginibong sesyon regular kan Martes. Noviembre 21. Sinabi ni Lavadia mahalaga na ihabol ninda an resolucion sa Senado mantang nagpapadagos pa an deliberasyon kan national budget para sa 2018 nganing tawan considerasyon an saindang kahagadan. Pig-check kan bise presidente sa national budget na enot nang nakalusot sa Camara-Baja asin yaon na sa Senado alagad nawara na si budget para sa re-orientation kan aeropuerto sa Pili, Camarines Sur, sabi pa kan consejal. Papadarahan nin copya kan resolucion iyo an Committee on Finance and Appropriation asin ki Senate Presidente Koko Pimentel. Makakatabang sa economia sa Ciudad nin Naga maging sa Camarines Sur oras na marealisar na an haloy nang plano sa proyecto sa aeropuerto na enot nang pigtagamahan nin P3.5 bilyon kan 2016 ni dating Presidente Benigo Aquino III na dapat ma-implementar kan dating DOTC ngonian na taon 2017 asin target na taposon sa 2019. An Capitolyo Provincial kan Camarines Sur nagsangat na nin expropriation case sa corte contra sa apekatadong paraoma asin nagpaluwas na nin writ of possession.