ISYU SA NAGA AIRPORT: DOTr hinahagadan paliwanag ni Bordado

Ciudad nin Quezon – Nagkaperang mga isyu an dapat ipaliwanag kan Department of Transportation (DOTr) sa mga congresista kan Camarines Sur sa isyu kan P3.5 bilyon na alokasyon sa re-orientation kan Naga Airport sa Pili, Camarines Sur na dapat ma-implementar ngonian na taon. Si Congresista Gabriel H. Bordado Jr. kan tercer distrito kan Camarines Sur nagpahayag sa entrevista kan Bicol Mail sa paagi nin telepono na nagsurat na siya ki DOTr Secretary Arturo Tugade nganing maaraman ninda kun ano si nangyari sa bilyones pesos na alokasyon sa aeropuerto sa Camarines Sur. Kabali sa pighahapot kan congresista sa saiyang surat sa DOTr kun ano na si status kan proyecto, pera na an nausar sa alokasyon na P3.5 bilyon asin ano an time line kan ahencia sa iimplementar na re-orientation kan aeropuerto. Sinda Congresista Bordado, LRay Villafuerte kan segundo distrito asin Salvio Fortuno kan ika-limang distrito gabos kan provincia nin Camarines Sur nagtatarabang nganing maaraman kun napasain an pighahanap na fondo asin dadarahon an isyu sa Bicameral Conference Committee mantang pendiente pa sa debate kan senado an General Appropriation Act para sa 2018. Si Congresista Villafuerte nagpahayag man sa media na si alokasyon sa Naga Airport namaniobra ni 4th District Congressman Noli Fuentebella nganing ibalyo sa San Jose Airport. Si Bise Presidente Leni Robredo kan mag-atubang sa halipot na oras na entrevista kan media sa Calabanga, Camarines Sur nagpahayag na nawara na si budget sa Naga Airport para sa 2017 asin 2018 envez an igwa nang budget si propuestong San Jose Airport sa Partido District. Si dating DOTC Secretary Joseph Emilio Abaya nagkumpirmar kaidto sa ginibong multi sectoral forum sa Ciudad nin Naga kan Agosto 18, 2015 kaibanan si Presidente Noynoy Aquino na igwa nang alokasyon na P3.5 bilyon para sa re-orientation kan Naga Airport. Pigpresentar pa kaidto an feasibility study asin dapat maimplementar an proyecto ngonian na 2017 asin tataposon sa 2019. (DPA)