SA RE-ORIENTATION KAN NAGA AIRPORT: Hinalian budget, San Jose Airport igwa nang fondo sa 2018

An Naga Airpot sa Pili, Camarines Sur na perang taon nang pig-oorolayan an re-orientation kaini alagad dai na kabali sa national budget sa 2018 envez nakabali sa may prosupuesto iyo an puponan pa sanang construksyon kan San Jose Airport sa Brgy. Pogay, San Jose, Camarines Sur na sakop kan ika-apat na distrito ni Diputado Noli Fuentebella. ‘’Nawara na si budget para sa aeropuerto sa Naga, para sa 2017 asin dai na kabali sa 2018 national budget alagad an igwang budget iyo an San Jose Airport na kaipuhan ma-ipaliwanag kan Department of Transportation (DOTr) kun ano si nangyari kun nagribay nin plano tano ta mayong consultasyon’’. Ini an mga pahayag ni Bise Presidente Leni Robredo kan mag-atubang sa ambush interview asin kan ihapot kan Bicol Mail an isyu sa haloy nang plano sa re-orientation kan aeropuerto. Nag-atubang siya sa miembros kan media antes gibohon an miting kan Technical Working Group (TWG) kan Calabanga Infirmary Hospital sa Sitio Labog, Calabanga. Duwang taon na an nakakaagi an dating DOTC igwang nakatagamang P3.5 bilyon para sa sinambit na proyecto sa aeropuerto. Sinabi ni 3rd District Congressman Gabriel H. Bordado Jr. kan tercer distrito kan Camarines Sur, an General Appropriation Act para sa 2018 pendiente pa sa debate kan senado asin dadarahon niya an isyu sa Bicameral Conference Committee. Sa ginibong forum on PNR modernization sa Ciudad nin Naga dai palang nahahaloy, hinapot na an isyu sa aeropuerto ki Undersecretary Cesar Chavez na dai man nasimbagan. Kun magigirumdoman may duwang taon na an nakakaagi, segun pa sa bise presidente an dating DOTC nagkaigwa na kaidto nin pag-presentar asin pinaliwanag pa sa mga Bikolando si direkyson kan aeropuerto. Igwang feasibility study an ahencia na kun haen may tolong pagpipilian na iyo an minasunod; enot si pagpalaba kan runway alagad iginilid ini huli ta magastos nin dakulang cantidad na makakakan pa an tinampo sa national highway na kaipuhan maggibo nin bagong lugar kan tinampo, ika-duwang opsyon iyo an paghanap nin bagong lugar sa Pamplona o sa Libmanan alagad dai ini pigconsiderar envez pinaboran an pag re-orient kan aeropuerto na iyo an dapat ma-implementar. May dugang giraray na gastos dahil ta may apektadong mga paraoma. Naging envuelto pa kaidto si Ateneo de Naga University na iyo man si bahala sa social preparation alagad sa ngonian hinali si prosupuesto na dating nagcacantidad nin P3.5 bilyon, ‘’ano gustong sabihon nagribay na nin plano dapat ma-ipaliwanag asin paagihon sa consultasyon, sabi pa kan bise presidente. Sa plano kan dating DOTC an proyecto sa Naga Airport dapat punan ngonian na taon asin matatapos sa 2019 asin pig-aseguar pa kaidto kan ahencia na mayo sa plano na ibalyo an aeropuerto sa ibang lugar kan Camarines Sur. An propuestong San Jose Airport saro sa mga proyecto ni Diputado Fuentebella nagkaigwa nang ground breaking ceremony kan Febrero 2017 na naging mayor na bisita si DOTr Secretary Arturo Tugade. An pagpahiwas kan Naga Airport, enot nang pigplano kan panahon ni dating Presidente Joseph Estrada dai natapos an saiyang termino asin dagos nang dai narealisar an proyecto na pigpunan na kuta si orolay sa pagpahali kan mga apektadong paraoma. Nagribay si dating Presidente Gloria Macapagal-Arroyo na saro man sa nagpangako alagad dai man narealisar. (DPA)