Campaña kan NCPO vs droga, dai nagpapahingalo

November 30, 2017

Dawa enot nang ibinalik ni Presidente Rodrigo R. Duterte sa Philippine Drug Enforcement Agency (PDEA) an guerra contra sa droga alagad an Naga City Police Office (NCPO) nagpapadagos kan saindang campaña sa ilegal na droga.

An NCPO sa liderato ni City Director Police Sr. Supt. Jonathan Panganiban nagpapadagos kan saindang campaña sa droga mantang kabali ini sa sindang trabajo sa paglaban sa kriminalidad.

Ini an mga pahayag ni SPO2 Tobias Bongon, opisyal na parataram kan NCPO kasunod kan pahayag ni Duterte na ibubuelta kaini sa Philippine National Police an guerra sa droga sa isyu na kulang nin personajes an PDEA.

An guerra sa droga tinutokan kan PNP sagcod na nagkaigwang mga madugong operasyon asin dakul si mga nagagadan na mga envuelto sa ilegal na droga sa sahot kan awtoridad na nagprobar na magtomang, kabali na digdi si mga biktima nin extra judicial killings kaya ngani hinali sa PNP asin pigbuelta sa PDEA.

Alagad an plano ni Duterte ibabalik sa PNP, sa lado kan NCPO piglinaw ni Bongon na dai man sinda nagpapahingalo sa campaña laban sa sinambit na ilegal na actividad.

Katuwang ninda iyo an Naga City Dangerous Drug Board na pinamamayohan ni Toti Importante.

Sa PDEA, sinabi ni Agent Vidal Bacolod jefe kan ahencia digdi sa Camarines Sur na kulang talaga sinda sa personajes asin mayo sindang cuestion kun magiging katuwang ninda liwat an PNP.

An PDEA sa  Camarines Sur iyo an may halangkaw na acomplisimiento sa campaña sa droga digdi sa Bikol puon na ibalik sa sainda an guerra contra sa ilegal na actividad mala ngani maabot na sa viente an saindang nagkakadarakop asin anas sinangatan na nin caso sa corte sa pagbalga kan Comprehensive Dangerous Drugs Act of 2002.






 

Share on Facebook
Share on Twitter
Please reload