Propaganda kan Casureco II vs CDA Bikol, kaputikan

November 30, 2017

Isinisikwal kan Cooperative Development Cooperative (CDA) an pigkukuriyat na propaganda kan Camarines Sur II Electric Cooperative (Casureco II) na malangkaw an singil sa tarifa nin corriente kun papaboran sa pigtalaan na referendum na magrehistro an cooperativa nin electricidad bilang stock cooperative.

Alagad kabaliktaran an pigsasabi kan Casureco II pwede lugod na magbaba an singil sa tarifa huli ta ma-ililibre na sa mga babayaran sa buwis, sabi kan CDA.

‘’Dai ko aram kun ano an saindang pigbasehan mayong dahilan na maglangkaw an singil sa tarifa sa corriente kun magparehistro an sarong coooperativa nin electricidad sa CDA asin ano man na planong paglangkaw nin tarifa kaipuhan pa an pag-aadal kaini kan Energy Regulatory Commission (ERC), sabi ni Regional Director Ma. Lourdes Pacao sa entrevista kan Bicol Mail.

An Casureco II nagtalaan nin Annual General Membership Assembly (AGMA) sa Diciembre 9, 2017 sa Capitol Convention Center, Pili, Camarines Sur asin isasabay na digdi an referendum na papapilion sa tolong mga kahapotan an miembros-consumedores, 1. Kun dapat ipadagos an presenting manijamiento sa irarum kan NEA, 2. Kun dapat nang magparehistro bilang stock cooperative sa irarum kan CDA asin 3. Kun dapat magparehistro bilang stock corporation sa irarum kan Security and Exchange Corporation.

Piglinaw pa kan CDA na mababa ngani an tarifa mantang si mga ginagastos kan manijamiento kan cooperativa nin electricidad ma-ililibre na arog kan dakulang cantidad na binabayad sa buwis.

An sarong stock cooperative o rehistrado sa CDA igwang marerecibing patronage refund huli ta dai man naka-defende sa capital share o iyan naka-defende kun gurano kadakol nagagamit kan serbisyo kan cooperativa. ‘’Mantang nagcoconsumo ka nin corriente, nagtatangkilik ka kan saindang serbisyo iyan si inaapod na balik tangkilik or patronage refund sa gabos na miembros na naggagamit corriente’’, sabi pa ni Pacao.

Maabot na sa 1,072 an rehistradong cooperativa sa irarum kan CDA Bikol asin puede nindang aramon sa arin man sa sainda kun panong nakakarecibe nin dibidendo asin patronage refund an mga miembros.

An mga pahayag na iyan kan CDA Bikol pinaluwas bilang kasimbagan sa padagos na pigkukuriyat na propaganda materials sa rinibong miembros-consumedores sa mga banwaan na sakop kan Casureco II.

‘’one sided’’ sana an isyu paborable sa presenting manijamiento kan mga cooperativa nin electricidad nganing mamantenir na sinda yaon sa irarum kan superbisyon kan National Electrification Administration.

Sa pahina cuatro sa pigkukuriyat na mga babasahon sinabi sa hapot asin simbag sa lenguahe nin tagalog ‘’Posible bang magtaas ng singil sa kuryente sakaling maging stock cooperative o stock corporation an ating kooperatiba’’ an simbag Oo, malaki ang posibilidad na magtaas ng singil sa kuryente sakaling maging stock cooperative o stock corporation ang ating kooperatiba. Dahil sa lagak na capital, umaasa ng kita o dibidendo ang mga kapitalista o namuhunan kaya nararapat lamang na lagyan ng patong o tubo sa ating monthly electric power  bill upang masiguro na may paghahatian an mga namuhunan taun-taon’’.

Dawa rehistrado na sa CDA an arin man na cooperativa nin electricidad an NEA obligado na magtabang arog kan ginigibo kaining ayuda o serbisyo sa presenting manijamiento kan cooperativa.             (CDA)


 

Share on Facebook
Share on Twitter
Please reload