Mga acomplisimiento sa droga kan PDEA-CSur pigrereconicer kan SP

Matapos kan sunod-sunod na mga acomplisimiento kan Philippine Drug Enforcement Agency (PDEA)-Camarines Sur sa mga operasyon laban sa droga na nagresulta nin pagkakadakop sa darakulang mga personalidad sa ilegal na droga, asin pagkakakumpiskar kan mga pinapangalad na binultong droga, an Sangguniang Panlungsod kan Ciudad nin Naga nagpasar nin resolucion nganing matawan sinda nin komendasyon. Si Consejal Joselito S.A. Del Rosario, padreno kan resolucion nagsabi na maninigo na midmidon an mahalagang acomplosimiento kan PDEA-Camarines Sur huli ta sa halipot sanang panahon matapos ibalik ni Presidente Duterte sa sinambit na ahencia an misyon sa droga, an mga darakulang personalidad sa ilegal na droga sa Ciudad nin Naga asin Camarines Sur an saindang nagkadarakop na mayong nagagadan sagcod nakaabot pa sa provincia nin Cavite an saindang anti-drug operations. Sa resolucion ni Del Rosario na inaprobaran sa ginibong sesyon regular kan Martes, Noviembre 28 kabali sa pigbiklad na mga acomplisimiento kan mga ahente asin operativa kan PDEA-CamSur iyo an ginibong operasyon kan Noviembre 4 na nagkadarakop an apat na mga suspechado na hali sa Metro Manila na sinda: Olivia Encinas, 60 años, Rodi Gundo y Parajes, 34 años, Joel Saut y Alpunoso, 35 años asin Alvin Andaya y Indrena, 37 años na nakua sa sainda an sarong kilong shabu na nagcacantidad nin P6 milyon; Sa sunod na follow-up operations kan Noviembre 8, an pinagsarong fuersa kan PDEA CamSur, sa coordinasyon sa PDEA Regional Office 4-A na pinamamayohan ni Director Archie Grande asin PDEA-Region V na pinangenotan ni Director Christian Frivaldo, sa ginibo nindang anti-drug operations sa Kawit, Cavite, saindang nadakop an supplier nin droga ni Encinas na sinda Solomon Lewi Anochiwa, 34, taga New City Subd., Kawit, Cavite asin Desmond Chima Ozoma, 35 nag-eerok sa Bitucan, Ciudad nin Parañaque, na parejong Nigerians. Nakumpiskar sa duwa iyo an sarong kilo nin shabu. Kan Noviembre 23, sa liwat na operasyon kan PDEA-CamSur harani sa Bicol Central Station, nakadakop naman na dorogista na sinda Ceasar Galiza y Blinis, 30, asin Marilex Arbuis y Comprado, 32, na midmid sa alyas na ‘’Drug Princess’’ sa Ciudad nin Naga, magkasaroan an duwa asin nag-eestar sa Brgy. Del Rosario, Ciudad nin Naga. Nakumpiskar sa sainda iyo an sangatos (100) na gramos nin shabu na nagcacantidad nin P600 mil. Dai palang nahahaloy, nasentenciahan kan corte nin habang buhay na pagkalaom sa carcel an nadakop na dorogista na si Romeo Reconday y Neserio, na nadakop man kan PDEA kan Mayo 14, 2015 na nagpapabakal nin P200 mil na cantidad nin shabu. An mga nagparticipar sa sinambit na mga operasyon iyo an matatawan nin komendasyon na kinababalihan kan pamayo kan PDEA-CamSur, anom na mga ahente asin tolong sibilyan. (dpa)