LGU Naga mapatindog munumento ni Bonifacio

December 7, 2017

Pig-aandaman na kan lokal na gobierno kan Ciudad nin Naga na magpatindog nin munumento ni Andres Bonifacio na dapat marealisar antes magcelebrar kan National Heroes Day sa Noviembre 30, 2018.

Si Consejal Elmer Baldemoro, proponente kan ordinansa nagsabi na dapat tanawon an mga contribusyon asin sacrificio ni Bonifacio kan panahon nin revolutionary war sa paagi nin pagpatindog nin munumento sa ciudad.

Kadakli kan mga ciudades asin mga provincia sa nasyon mayong naheheling na munumento ni Bonficacio alagad digdi sa Naga suportado kan opisyales lokal na naghahanap pa nin tamang lugar na dapat sa pampulikong espacio.

Si Alec Santos, pamayo kan Arts, Culture and Tourism Office (ACTO) iyo an natukahan na maggibo nin feasibility study asin nagsumiter na kan saiyang preliminary report sa sesyon regular kan Sangguniang Panlungsod kan Martes, Diciembre 5.

Sinabi ni Santos ano man na pag-establiser nin munumento dapat magsunod sa policia hali sa National  Historical Commission of the Philippines (NHCP) sa irarum kan Seksyon 5 (c) kan Acta Republica 10086.

Kun malaog sa full-body na munumento  kaipuhan igwang pedestal na dapat parejo an langkaw niya asin an langkaw niya iyo man an espacio sa hiwas kan daga na maninigo sa pampublikong lugar alagad dai ginagamit an espacio sa ibang katuyohan arog garajehan nin vehiculos, sabi pa ni Santos.

 An ACTO nakatalaan kaolayon an naging curator kan JMR Coliseum nganing magpatabang sa propuestong munumento na dapat pusog na dai kayang mapatumba nin bagyo asin linog.                               (DPA)




 

Share on Facebook
Share on Twitter
Please reload