PPO CSur ibabalyo sa dating campo kan AFP

December 7, 2017

Pighahace kan Bikol PNP na ibalyo na an  PNP Provincial Office (PPO) kan Camarines Sur sa dating Camp Canuto kan Fuersa Armada kan Filipinas (AFP) digdi sa Bikol sa Barangay Sagurong sa banwaan kan Pili asin an presenting PPO iyo an magiging central headquarter kan Naga City Police Office.

Sa ginibong ground breaking ceremony kan Police Station 4 kan NCPO sa Barangay Carolina, Ciudad nin Naga si Chief Supt. Antonio Gardiola, regional director kan Bikol PNP nagpahayag na sainda nang kinakaolay an mga heredero kan familia Rodriguez na iyo an kagsadiri kan lote sa dating kinamumugtakan kan Camp Canuto na idonar na sa PNP an dating campo kan militar sa Bikol.

An bagong campo kan militar perang taon nang naghali sa Brgy. Sagurong asin yaon na ngonian sa Barangay San Jose, Pili, Camarines Sur na iyo na ngonian an cuartel general kan 9th Infantry Division kan Philippine Army digdi sa Bikol.

Dai na maninigo sa Ciudad nin Naga na yaon digdi an PPO huli ta an NCPO, saro nang district command asin nasa irarum na kan Camp Simeon Ola kan Bikol PNP, sabi pa ni Gardiola.

Saiya nang nakaolay si Alcalde Tomas Bongalonta kan kabesira kan provincia na nagpahayag nin pagpabor ibalyo sa saindang banwaan an PPO kan Camarines Sur.

 Si Sr. Supt. Jose Maria Ramos, Director for Logistic kan Campo Crame na presente sa actividad kan NCPO sa Barangay Carolina nagpahayag na andam sindang magtagama nin fondo kun marerealisar an lote na babalyohan kan PPO.                                                                                   (DPA)








 

Share on Facebook
Share on Twitter
Please reload