SA PNR: Viaje kan Naga-Legazpi dai pang paglaom na maibubuelta

December 7, 2017

Pwedeng magderetso an viaje kan commuter train kan Philippine National Railways (PNR) hasta sa Ciudad nin Legazpi mantang igwang asegurasyon an Engineering Department sa kapusogon kan relis kan perokarril alagad an problema iyo an kakulangan nin makina asin kotse.

Kan mga nakaaging bulan igwa nang viaje an PNR pasiring sa Ciudad nin Legazpi dai na pinadagos kan manijamiento huli kan loma nang makina asin kotse.

Kan panahon ni dating PNR General Manager Ower Andal pigpunan na an viaje sa rutang Albay alagad biglang pinapundo sagcod na ribayan siya sa posisyon, ibinuelta naman asin liwat naman binawi na sagcod sa ngonian dai na pinadagos.

Si Engr. Jose Florece, PNR Division Manager nagpahayag sa entrevista kan Bicol Mail an saindang pigpapadagos nalang iyo an regular na viaje kan commuter train haling Ciudad nin Naga hasta Sipocot, Camarines Sur asin pabalik sa ciudad.

Sinabi pa dawa isagad an viaje hasta sa Ragay PNR Station pwede nang makalusot huli ta tapos na si rehabilitasyon kan nagrampahog na PNR Bridge sa Ragay, Camarines Sur kan Marso 5, 2016 asin natapos an patrabajo kan Diciembre 6, 2016.

Nagpapadagos an operasyon kan PNR Bikol huli sa subsidia kan saindang opisina central cada-bulan mantang an saindang ingreso aroaldaw pigreremiso sa Manila.

Naglangkaw na an saindang ingreso aroaldaw hali sa dating P19 mil asin nagsakat na sa P22 mil puon na mag-epekto an dos pesos na dugang na flete puon kan Noviembre 1, 2017.

An dugang na flete sa mga pasajeros kan perokarril pig-implementar kasunod kan  board resolution kan manijamiento mientras na si dating sinisingil na hababang flete perang decada nang pinapasunod.                                (dpa)





 

Share on Facebook
Share on Twitter
Please reload