ISYU SA RE-ORIENTATION KAN NAGA AIRPORT: MNCCI, CSCCI hinahagad sa gobierno ibuelta an fondo

Duwang organisasyon nin negociantes sa Ciudad nin Naga asin Camarines Sur an nagkasararo na magpasar nin resolucion nganing huroton sa gobierno nasyonal na ibuelta an P3.5 bilyon para sa re-orientation project kan Naga Airport sa Pili, Camarines Sur na enot nang pigtagama an fondo kan administrasyon ni dating Presidente Aquino. An Metro Naga Chamber of Commerce and Industry (MNCCI) asin Camarines Sur Chamber of Commerce and Industry (CSCCI) nagpasar nin joint resolution dai palang nahahaloy asin sainda nang pinadarahan nin copya iyo an mga minasunod; Camara-Alta, Camara-Baja, Department of Transportation (DOTr), National Economic Development Authority (NEDA), Regional Development Council (RDC) sa Bikol, mga congresista sa Camarines Sur asin an opisina ni Bise Presidente Leni Robredo. Si Gilbert Albuero, pamayo kan MNCCI nagsabi na dakulang paghinayang ninda sa abalang implementasyon kan proyecto mala ngani limang taon na nindang pigmamawot na dapat marealisar na an proyecto sa aeropuerto. An duwang organisasyon nagtutubod na makakatabang sa lado nin economia asin maging sa turismo kun marealisar an proyecto na dapat pigpuponan na. Si Bise Presidente Robrero iyo an nakadiscobre sa 2018 General Appropriations Bill na nawara na si alokasyon sa re-orientation kan Naga Airport maging kan 2017 dai na kabali envez natagamahan nin prosupuesto iyo an San Jose Airport sa Barangay Pogay, San Jose, Camarines Sur sakop kan congressional district ni Diputado Arnulfo Fuentebella. Sinabi ni Robredo sa miembros kan media sa Ciudad nin Naga, ‘’Nawara na si budget para sa aeropuerto sa Naga, para sa 2017 asin dai na kabali sa 2018 national budget alagad an igwang budget iyo an propuestong San Jose Airport. Si Congresista Gabriel H. Bordado Jr. kan tercer distrito kan Camarines Sur nagsurat naman ki Secretary Arturo Tugade kan Department of Transportation na dapat ipaliwanag kun ano si nangyari sa bilyones pesos na alokasyon sa aeropuerto sa Camarines Sur. Sinabi man ni Congresista LRay Villafuerte kan segundo distrito kan Camarines Sur na nagtatarabang na sinda ni Congresista Bordado asin Salvio Fortuno kan Rinconada district nganing ibuelta an fondo sa re-orientation kan Naga Airport. Duwang taon na an nakaagi an dating DOTC kan panahon ni dating Presidente Benigno Aquino III igwa nang pigtagamang P3.5 bilyon na dapat maponan an proyecto ngonian na 2017. Sa lado kan Capitolyo Provincial kan Camarines Sur sinabi ni Gobernador Migz Villafuerte na nagtao na nin cantidad P400 milyon an DOTr nganing ibayad sa apektadong mga paraoma sa proyecto kan aeropuerto.