SA SAN JOSE AIRPORT PROJECT: Pagsingit sa 2018 GAB pinapa-investigaran

Tolo sa limang mga congresista kan Camarines Sur hinuhorot na sa House Committees on Transportation and Appropriations na aramon bilang ‘’in aid of legislation’’ an nangyaring pagsingit kan San Jose Airport Project sa 2018 General Appropriations Bill (GAB) mantang anom sa sampolong mga alcalde kan Partido district sa Camarines Sur kabali an LGU San Jose na yaon digdi namumugtak an aeropuerto nagcocontra sa sinambit na proyecto. Sa paagi nin resolucion na pig-introducir ninda Congresista LRay Villafuerte kan segundo distrito, Gabriel H. Bordado Jr. kan tercer distrito asin Salvio B. Fortuno kan ika-limang distrito asin narecibe na sa Camara-Baja an copya alas 4:45 hapon kan Diciembre 5 nganing mainvestigaran kan duwang komite an sinambit na isyu sa aeropuerto. Sinabi sa resolucion, an San Jose Airport sa CamSur nakaayon sa listahan nin mga aeropuerto na ‘’upgraded’’ asin preparado para sa ‘’night commercial flight operation’’ sa masunod na taon 2018. Napag-araman pa na an alokasyon sa aeropuerto kabali na sa 2018 General Appropriations Bill: An cantidad na P200 milyon nasa pahina 84, volume I-B asin P24,459,000.00 para sa construction, rehabilitation and improvement makukua sa pahina 85 kan kaparejong volume. Si Bise Presidente Leni Robredo enot nang nagpahayag sa miembros kan media sa Ciudad nin Naga ‘’Nawara na si budget para sa aeropuerto sa Naga para sa 2017 asin dai na kabali sa 2018 General Appropriations Bill alagad igwa nang budget iyo an San Jose Airport na dapat ipaliwanag kan DOTr kun ano si nangyari kun nagribay nin plano tano ta mayong consultasyon’’. Sinabi pa resolucion, an aeropuerto sa Naga an pagpalaba kan runway asin pagpahiwas kaini kaayon sa 15 year plan, asin igwa prosupuesto sa mga nakaaging taon kabali an P1.002B sa 2016 General Appropriations Act asin P670M kan 2015, afuera pa kaini an dating DOTC aprobado na kan ahenciang ini an presenting domestic airport’s location, kan nakaagi pang Hulyo 15, 2013. An programa para sa Naga Airport Development aprobado bilang prioridad na proyecto kan NEDA, asin igwang nagdadanay na Memorandum of Agreement entre kan Department of Transportation asin Gobierno Provincial kan Camarines Sur. Magigirumduman an propuestong San Jose Airport saro sa mga proyecto ni Congresista Arnulfo Fuentebella kan Partido district nabisita na ni DOTr Secretary Arturo Tugade kan siya naging juespe sa ginibong ground breaking ceremony kan Febrero 2017. Si Fuentebella, mayo paman reaksyon sa resolucion kan tolong mga pag-iriba niyang lehislador sa congreso.