AFP, NPA parejong nakaalerto

December 14, 2017

An Fuersa Armada kan Filipinas asin New People’s Army parerejong nakaalerto ngonian na panahon nin pasko asin pagsabat kan bagong taon kasunod kan harayo na an posibilidad na ipasunod an ceasefire makalihis ideclara ni Presidente Rodrigo Duterte na sarong teroristang organisasyon an CPP/NPA.

Si Col. Teody Toribio, opisyal na parataram kan Southern Luzon Command (SOLCOM) nagpahayag sa media na madidiscarel na an taonan na declarasyon sa untok putok sa cada pagsabat kan pasko asin bagong taon huli kan mahiwas nindang operasyon laban sa rebeldeng NPA.

Alagad saiyang pig-asegurar an publiko na estricto nindang ipapasunod an ley orog na an international humanitarian law sa mga ilalansar nindang internal security operations nganing maseguro an katrangkilohan kan sarong lugar.

Sinabi pa kan opisyal kan militar na kun magpaluwas nin directiva an saindang higher command na magkakaigwa man giraray nin suspension of military operations (SOMO) ini paborable sa familia kan mga soldados, alagad padagos na magiging alerto an tropa contra sa mga kalaban kan gobierno.

Sa 9th Infantry Division kan Philippine Army sa Bikol, sinabi ni Army Capt. Joash Pramis, jefe kan Division of Public Affairs digdi na pigkakarkulo na labi pa sa docientos an armadong miembros kan NPA sa rehiyon cinco alagad dawa considerado nang nagbaba an saindang fuersa dai pa ninda tinatawan an posibleng paghasok pa nin kariribokan kan mga rebelde.

Saro sa tinututokan kan 9th ID iyo an mga internal security operations nganing macierto na matuninong an saindang area of responsibility.




 

Share on Facebook
Share on Twitter
Please reload