Kadakli kan mga LGU mayong Tourism office, Tourism code

December 14, 2017

Ciudad nin Legazpi – An Department of Tourism (DOT) nakatutok sa programa sa turismo alagad kadakli kan mga lokal na gobierno sa Kabikolan mayong opisina sa turismo asin mayo pa nin Local Tourism Code.

Ini an mga pahayag sa miembros kan media ni DOT Regional Director Benjamin Santiago mantang dakulang bagay sa saindang ahencia na dapat yaon an suporta kan mga LGUs nganing pakusogon an turismo sa Kabikolan bako lang sa nagkaperang lugar arog kan provincia nin Albay na yaon digdi an bantugan na Volcan Mayon,  Camarines Sur na yaon digdi an CamSur Watersport Complex (CWC), asin Sorsogon na yaon man digdi an butanding.

Dai sakop kan DOT na mag-organisar kan mga Tourism Office envez yaon ini sa juridiksyon kan lokal na gobierno mantang saro sa mga rekisitos kan Department of Interior and Local Government (DILG) nganing maging candidato sa Seal of Good Governance an sarong LGU dapat igwang sadiring TO asin Tourism Code.

Sinabi pa na mahalaga an Tourism Code na dapat pandayon kan Sanggunian Bayan o Sanggunian Panlungsod nganing matagamhan nin prosupuesto an mga potensyal na lugar na pudeng dayuhon nin turista asin igwa susunodon  na mga programa asin policia na dapat iimplementar.

Hinagad kan DOT an cooperasyon kan mga LGU na sagcod sa ngonian dai pang Tourism Code asin maninigo na magcrear nin posisyon para sa Tourism Officer nganing makatabang asin maging operational an mga programa sa turismo.

An sarong lugar na pigdadayo nin mga turismo makakatabang sa lado nin economia asin dagdag trabajo.

Haloy nang pigmamando kan DILG na dapat an mga LGU magcrear kan sinambit na opisina alagad digdi sa Bikol kadakli sa sainda mayong opisina.

Alagad napag-araman sa ibang LGUs an dahilan sa kawaran ninda kan TO asin LTC huli sa kakulangan nin fondo asin mayo man nin potensyal na lugar para sa turismo na puedeng dayuhan kan lokal asin dayuhan na turista.     (MM)








 

Share on Facebook
Share on Twitter
Please reload