Lakbang kan San Felipe-Calauag road gigibohon veinte metros

December 14, 2017

Isasabay na kan City Hall an lakbang kan tinampo sa national road sa icoconstruhir na San Felipe-Calauag road na may lakbang na nin viente metros asin igwa nang prosupuestong treinta y cinco milyon pesos.

An patinampo iyo an magiging alternatibong ruta kan M.T. Villanueva Avenue (dating Calle Liboton) na perming gurubot an bulos kan trafico na nakatalaan naman pahiwason kan Department of Public Works and Highways (DPWH) an lakbang kan tinampo na gigibohon nang viente metros.

Si Assistant District Engineer Richard Ragragio kan 2nd Engineering District kan DPWH sa baras, Canaman, Camarines Sur nagkumpirmar na igwa nang fondo sa road widening kan M.T. Villanueva Ave na piglalaoman iimplementar an proyecto sa enot na cuarto kan taon 2018.

Si Bise Alcalde Nelson Legacion, pamayo kan Sanggunian Panlungsod nagsabi na perang taon nang nakatagama an fondo alagad  nakaabala sana iyo an expropriation case,  huli kan mayo nang gayong kaulangan sa road right of way puponan na kan City Engineers Office an pamtambak nin daga.

An cantidad na P35 milyon an tinagamang fondo kan City Hall bilang inaapod na continuing appropriation sa katuyoan na dai maabala an contruksyon kan patinampo.

Bako na sa sukol na city road an lakbang envez pigsabay na sa national road huli kan nagdadakul na vehiculos sa ciudad, sabi pa kan bise alcalde.

Si Consejal Vidal Castillo, pamayo kan Committee on Infrastructure sa Sanggunian Panlungsod, iyo an nagrecomendar sa City Hall na dapat magbukas nin alternatibong tinampo sa sinambit na lugar mantang maninigo na ini sa tahaw kan padagos na nangyayaring pagkagurobot kan trafico sa MT Villanueva.

Digdi na nag-aaragi an vehiculos haling Tinambac, Calabanga, Magarao, Bombon asin Canaman, CamSur maging si hali pa sa ibang mga barangay kan ciudad lalo na si mapasiring sa Pili, Camarines Sur, sabi pa kan Consejal.

Pigtawan prioridad kan City Hall an recomendasyon ni Castillo na pigtagamahan tolos nin dakulang fondo.                                                                               (dpa)



 

Share on Facebook
Share on Twitter
Please reload