SA NAGA AIRPORT: Nawawarang budget dapat ipaliwanag kan DOTr, DBM

December 14, 2017

An Department of Transportation (DOTr) asin Department of Budget and Management (DBM) iyo an may sisimbagon kun dai ibinali sa budget an re-orientation project kan Naga Airport sa 2018 General Appropriations Bill (GAB) alagad an bagong propuestong aeropuerto sa San Jose, Camarines Sur iyo an may prosupuesto sa GAB.

Bako lang isyu sa re-orientation kan aeropuerto alagad pati na an planong modernisasyon kan Philippine National Railways (PNR), an dapat ipaliwanag ni DOTr Secretary Arturo Tugade.

Ini an mga pahayag ni Bise Presidente Leni Robredo sa ginibong press conference sa Ciudad nin Naga na pigtawan niya nin prioridad na simbagon asin ipaliwanag an isyu sa mga kahapotan kun ano kamugtakan sa re-orientation kan Naga Airport asin PNR Bicol Express.

Pig-osipon kan bise presidente na nagkaperang veces na siyang nagprobar na makaolay si Sec. Tugade alagad maulyas asin sinabi kaini sa tataramon na ingles ‘’We have been trying to communicate with Secretary  Tugade for weeks, but have not been able to secure an appointment to discuss the matter’’.

    Mawot niyang makaulay si Tugade kun ipapadagos pa an proyecto sa Naga Airport alagad apesar kan saiyang pigtalaan na mga appointment sa laog na nin nagkaperang semana parating nagpapalyar.

Saiya pang sinabi na kan taon 2013, an dating DOTC nagpagibo nin feasibility study nganing para sa rehabilitasyon asin pagpakarhay kan Naga Airport sa San Jose Pili, Camarines Sur.

Igwang pitong mga pigpipilian base sa pag-aadal asin ini kinababalihan kan minasunod: l. relokasyon kan aeropuerto sa Libmanan, Camarines Sur, 2. Relokasyon kan aeropuerto sa Ocampo, Camarines Sur, 3. Relokasyon kan aeropuerto sa San Jose, CamSur, 4. North South re-orientation kan presenting aeropuerto, 5. Southeast Northwest re-orientation kan aeropuerto, 6. extension kan aeropuerto asin 7. Pag- upgrade kan aeropuerto.

Alagad base sa resulta kan feasibility study pigrecomendar an opsyon 5, na iyo an Southeast Northwest re-orientation kan Naga Airport.

An pag-aadal pigsumiter sa Regional Development Council asin National Economic Development Authority. Sinabi pa na kan taon 2015, an re-orientation kan Naga Airport nakakua nin alokasyon na P670 milyon, asin kan taon 2016, igwang P1 bilyon.

Nagngangalas an bise presidente kun tano ta nawara si prosupuesto kan 2017 asin 2018 sa sinambit na aeropuerto alagad an nakabali lugod sa 2018 GAB iyo an propuesto aeropuerto sa Brgy Pogay, San Jose, Camarines Sur .

PAGLAAG  BUDGET  SA SAN JOSE  AIRPORT BAKONG KASALAN NI NOLI

An ibang politico sa Camarines Sur nag-aacusar na maniobra ni Congresista Noli Fuentebella kan Partido district an budget sa Naga Airport nganing ibalyo sa San Jose Airport na ginibo pa sana an ground breaking ceremony kan Febrero 2017.

Alagad si Robredo nagtutubod na dai man nagkaigwa nin diversion kan fondo sa Naga Airport asin bako man ining kasalan ni Fuentebella. An sarong congresista nahanap nin espuersos na makakua nin prosupuesto para sa proyecto sa sakop na distrito para sa pag-asenso asin ecomonia kan saindang lugar.

An DOTr asin DBM dapat magpaliwanag kan isyu sa budget huli ta antes pigtagamahan nin fondo an Naga  Airport kan nagtalikod na administrasyon nag-agi sa gabos na proceso, sabi pa.

Napag-araman pa na si Catanduanes Congressman Cesar Sarmiento, pamayo kan House Committee on Transportation dai man nag-aaraman kan iimplementar na San Jose Airport.

LRAY, BORDADO, FORTUNO MAPA-INVESTIGARAN SA SAN JOSE AIRPORT

Kaibanan ni Robredo sa press conference iyo si Congresista Gabriel H. Bordado Jr. kan tercer distrito kan Camarines Sur nagpahayag na nagtatarabang na sinda ni Congresista LRay Villafuerte kan segundo distrito asin Salvio Fortuno kan Ika-apat na distrito nganing maaraman  kun tano ta dai nakabali sa 2018 General Appropriation Bill an prosupuesto sa Naga Airport.

Dai palang nahahaloy an tolong congresista kan CamSur nag-intrudocir na nin house resolution na hinuhurot sa House Committees on Transportation and Appropriations na investigaran an nangyaring pagsingit nin budget kan San Jose Airport Project sa GAB apesar na dai nag-agi sa tamang mga proceso.

Afuera pa kaini, anom sa sampulong mga alcalde kan Partido district kabali an LGU San Jose na yaon digdi namumugtak an aeropuerto cocontra sa sinambit na proyecto.

SA PNR

Liwat sinabi ni Robredo na dakulang bentaje sa gobierno kun papaagihon sa private-public- partnership (PPP) an iimplementar na modernisasyon kan PNR Bicol Express envez kan Overseas Development Assistant (ODA) na ma-utang an gobierno sa China na ma-patong nin dos por cientong interest rate mientras na sa nasyon kan Japan nag-oopresir sana nin .5 por ciento.

Hinagad kan Bise Presidente na magpa-apod liwat nin forum on PNR Modernization si Congresista Bordado kaibanan an grupo kan Naga Parochial School Batch ’67 asin Ateneo de Naga 1971 Association.              (DPA)




 

Share on Facebook
Share on Twitter
Please reload