9th ID, PNP nakaalerto sa pagsabat kan 2018

December 28, 2017

An 9th Infantry Division kan Philippine Army sa Bikol na nakabase sa Camp Elias Angeles, San Jose Pili, Camarines Sur asin an Camp Simeon Ola kan Bikol PNP parejong naka full-alert sa pagsabat kan bagong taon dawa nagdeclara na nin unilateral ceasefire si Presidente Rodrigo Duterte.

Pabor sa militar asin kapupulisan an desisyon ni Duterte nganing makacelebrar kan bagong taon kasabay an saindang familia mientras na suspendido an operasyon kan militar contra sa rebeldeng grupo, alagad mantenido ninda an full alert.

Ini nganing permi sindang andam sa posibleng paghasok nin kariribokan kan mga kalaban kan gobierno dawa na declarado an untok putok.

Si Brig. General Danilo Chad Isleta, bagong iinstelar na commanding general kan 9th ID sa Bikol na may base sa Camp Elias Angeles, Pili, Camarines Sur asin Regional Director Chief Supt. Antonio Gardiola kan Camp Simeon Ola sa Ciudad nin Legazpi pig-andam an saindang tropa na dapat maging alerto sa saindang mga campo contra sa mga kalaban kan gobierno dawa pa nasa irarum kan unilateral ceasefire an gobierno.

An suspension of military operation (SOMO) epektibo kan Deciembre 23 hasta Deciembre 26 asin liwat iimplementar sa Deciembre 30 hasta Enero 2, 2018.

Dai palang nahahaloy hinipaan kan armadong rebeldeng NPA an miembros kan PNP sa Labo, Camarines Norte na saro an binawian nin buhay asin pito an nairedo.

Bako lang sa PNP Camarines Norte dapat naka-full alert envez an enterong mga PNP Provincial Office sa Kabikolan,  sabi ni Gardiola.

Dawa activo pa an CPP/NPA sa Kabikolan alagad an mga awtoridad nagtutubod na magiging matuninong an celebrasyon sa pagsabat kan bagong taon sa rehiyon.                                                                     (dpa)


 

Share on Facebook
Share on Twitter
Please reload