Bus terminal, milyonaryo na

December 28, 2017

An Bicol Central Station (BCS) na pinapadalagan kan lokal na gobierno kan Ciudad nin Naga igwa nang milyones pesos na net income na nag-abot na sa P28.5-M mala ngani halangkawon na an saindang inaapod na percentage financial sufficiency na nagsakat na sa 268.91% base sa 2016 income statement mientras puon kan Enero hasta Noviembre 2017 nag-aabot na sa 229.90%  na may net income na P24.7-M na linalalaoman malangkaw pa ini sa pagtapos kan bulan nin Deciembre 2017.

Sa datus kan saindang financial sufficiency gustong sabihon kaini imposiblehon pang marhay na isubsidia kan lokal na gobierno an BCS na saro siyang economic enterprises na padagos nag-aasenso na toltol asin tama an pagpadalagan. Bakong arog kan ibang economic enterprises pagnagbaba an saindang financial sufficiency kaipuhan an subsidia kan LGU nganing magpadagos kan saindang operasyon, sabi sa Bicol Mail ni Operation Manager Roderick ‘Nonoy’ Reforsado.

Kan 2016 igwa sindang total revenue na P45.3 milyon hali sa terminal fees, stall rentals electricity bills, cash ticket asin iba pa mantang  nag-abot man sa P16.8-M an total operating expenses.

Ngonian na 2017 dai pa kabali an bulan nin Deciembre – igwang total revenue na P43.7-M asin sa total operating expenses – P19-M.

Nagaabot na sa P4.3-M an saindang total revenue cada bulan asin sa net income – P2.4-M.

An BCS, dating Central Bus Terminal pigmanijar nin  pribadong    corporasyon nagkakaigwa sana nin ingreso an City Hall nin maabot sa P16-M cada taon.

An City Hall nag-take over sa manijamiento kan bus terminal kan Enero 2011 sa premirong termino ni Alcalde John Bongat na nag-implementar nin mga pagbabago sa operasyon kan terminal nganing mapakarhay an serbisyo sa publiko.

Sinabi pa ni Reforsado na igwa na siyang pigsumiter sa jefe ejecutivo nin development plan para sa 2018 alagad padagos pang pigpaplantsya na saro na digdi iyo an plano na gibohon aircondition an waiting area nin pasajeros asin nakatutok sa mas lalong pagpakarhay kan serbisyo sa riding public.       

Afuera kan BCS, si Consejal Joselito Del Rosario pamayo kan Transportation Committee sa Sanggunian Panlungsod nagsabi na nakatalaan punan sa masunod na taon an kontruksyon kan East Bound Terminal na mamumugtak harani sa JMR Coliseum.

Saro naman na economic enterprises ini kan lokal na gobierno mientras na an operasyon kan terminal ilalaog sa public-private partnership.       

An propuestong East Bound Terminal perang taon nang pig-orolayan sa SP alagad sa premirong taon ni Del Rosario sa consejo nailusot man giraray na nagkaigwa nin halawig na mga debate.                (DPA)                          



 

Share on Facebook
Share on Twitter
Please reload