CamSur vs operasyon kan STL, corte nag-isyu TRO

December 28, 2017

An Mayors League of the Philippines, Camarines Sur Chapter nagkakasararo kan saindang panindugan na dapat ipapundo an operasyon kan Small Town Lottery (STL) huli kan mga pagbalga sa mga probisyones na pigmamando kan PCSO.

An Evenchance Gaming Corporation na iyo an may franquicia sa operasyon kan STL sa Camarines Sur pigrereclamo bako lang nin mga alcalde envez kan mga miembros kan junta provincial sa pamamayo ni Bise Gobernador Fortunato Peña asin an isyu dinara sa corte na nagpaluwas na nin Temporary Restraining Order matapos dangugon an argumento kan mag-ibong na lado.

Si Alcalde Fermin Mabulo kan banwaan nin San Fernando asin iyo an pamayo kan MLP, CamSur Chapter nagpahayag na kabali sa mga actividades na binabalga sa operasyon kan STL: 1. Paggamit sa mga menor de edad bilang mga kolektor nin pataya, 2. Dai nagsusulot nin PCSO-prescribed uniforms asin IDs kan mga ahente, 3. Pagpabakal nin tiket kan mga ahente luwas sa designadong STL stations asin sub-stations; 4. Nag-iisyu nin mga tiket na bako sa pigmamandong forma kan PCSO, asin 5. Pagpagamit kan STL operations bilang frontera sa ilegal na sugal na jueteng.

Huli kaini, an mga miembros kan junta provincial kan Camarines Sur sa pamamayo ni Bise Gobernador Peña asin mga alcalde na igwang STL stations nagsangat nin Injunction with Damages sa corte namay Civil Case No. P-2754 na naghahagad na mag-isyu nin Temporary Restraining Order/With Preliminary Injunction contra sa Evenchance Gaming Corporation.

An caso pigdangog kan Branch 32 kan RTC sa Pili, Camarines Sur sa pamamayo ni Juez Vivencio Gregorio Atutubo III.

Matapos kan mga argumento kan plaintiffs asin defendant na dinangog kan corte, kan Deciembre 15, 2017 an jusgado nagpaluwas desisyon na nag-iisyu nin non-extendible 20 days Temporary Restraining Order contra sa acusadong operator na igwang business o operasyon kan STL sa municipalidades kan Pasacao, Minalabac, Milaor, San Fernando, Bombon, Bato, Del Gallego, Buhi, Siruma asin Lagonoy.

An hinahagad na Writ of Preliminary Injunction nakatalaan vistahan sa Enero 4, 2018 alas dos nin hapon sa kaparejong corte.





 

Share on Facebook
Share on Twitter
Please reload