top of page

Propuestong planta nin corriente kaipuhan an PSA sa Casureco II

Kaipuhan pa an purchase service agreement (PSA) sa Camarines Sur II Electric Cooperative (Casureco II) nganing marealisar an Solar Power Energy na enot nang pigbuyagyag ni Bise Alcalde Ramon Robles na ibubugtak sa 130 hektaryang lote sa Barangay Bonot-Sta Rosa, Calabanga, Camarines Sur. Pigsumiter na an papeles sa Casureco II na kaipuhan pa an resolucion kan junta directiva. Ini an mga pahayag ni Robles sa tahaw kan paglangkag kan an ibang opisyales lokal asin namamanuan kan Calabanga, CamSur kasunod kan mga pahayag kan bise alcalde kan nagtalikod na taon na pigtalaan an ground breaking ceremony kan Septiembre 2016 alagad dai man nadagos. An bise alcalde iyo an nag-inbitar sa mga kapitalista asin kun madagos an proyecto dakulang bagay sa lado nin trabajo sa mga residentes kan saindang banwaan. Yaon an mga investor alagad an hinahalat iyo an PSA mantang puedeng magproducer nin energia an planta nin sagcod sa 60 megawatts na iyo an ipapabakal sa cooperativa nin electricidad, sabi pa kan bise alcalde. Saiyang pang sinabi na an mga investor gikan sa China, Japan asin Korea na nakatalaan magbugtak nin dakulang companya nin energia na kakapitalan nin abot sa P6.8 bilyon. Enot nang sinabi kaini, na padagos pa an ginigibong proceso sa pagkua nin certificate of commerciality sa Department of Energy asin kabali pa an papeles sa National Grid Corporation of the Philippines (NGCP) asin Environmental Compliance Certificate sa Department of Environment and Natural Resources.

bottom of page